COVID-19 ىندەتى تاراعان الەم ەلدەرىنىڭ كارتاسىنداعى قازاقستان مەن قىتاي. فوتو: اشىق دەرەككوز

23 ناۋرىز تۇستە قازاقستاننىڭ دەنساۋلىق ساقتاۋ مينيسترلىگى الماتى مەن استانادا تاعى ەكى ادامنان كوروناۆيرۋس انىقتالعانىن حابارلادى.

سوڭعى دەرەكتى قوسا ەسەپتەگەندە، ەلدە بارلىعى 62 ناۋقاس قاتەرلى ينفەكتسيا جۇقتىرعان.  ولار، استانادا – 32, الماتى قالاسىندا – 26, قاراعاندى قالاسىندا – ەكى، الماتى وبلىسىندا – ءبىر، اقتوبە وبلىسىندا ءبىر ادام، اۋرۋحاناعا جاتقىزىلعان. سونداي-اق پاتسيەنتتەرمەن بايلانىستا بولعان مىڭداعان ادام ءۇي-اۋرۋحانا كارانتينىنە الىنعان.

قازاقستانمەن كورشىلەس 5 ەلدىڭ احۋالى ءارتۇرلى. ءبىرى ءۇنسىز جاتسا، ەكىنشىسى توتەنشە جاعداي جاريالاپ، ىندەتتىڭ تاراماۋىنا شەكتەۋلەر ەنگىزىپ جاتىر. ال الەمدە COVID-19 ىندەتىنە شالدىققاندار 340 مىڭنان اسسا، ايىعا الماي كوز جۇمعاندار سانى 15 مىڭعا تايادى.

وزبەكستان

تاشكەنت مالىمەتىنشە، ەلدە شەتەلدەن كەلگەن جانە بايلانىستا بولعان 46 وزبەكستاندىقتان كوروناۆيرۋس ينفەكتسياسى تابىلىپ، اۋرۋحاناعا جاتقىزىلعان. 16 ناۋرىزدان باستاپ ەلگە كىرىپ-شىعۋعا تىيىم سالىنىپ، كوپشىلىك جيىن-وتىرىستارعا شەكتەۋ قويىلدى.

قىرعىزستان

كورشى اعايىن جۇرتتا كوروناۆيرۋس جۇقتىرعان 14 ناۋقاس تىركەلگەن. سونداي-اق پاكىستاندا ءبىر  قىرعىز ازاماتى دەرتكە شالدىققانى جونىندە رەسمي اقپارات بەلگىلى بولدى. قىرعىزستاندا بۇگىننەن باستاپ توتەنشە جاعداي ەنگىزىلدى. قازىرگى تاڭدا بىشكەك قوعامدىق ءتارتىپ باقىلۋىن كۇشەيتىپ، شەتەلدەگى ازاماتتارىن الدىرتىپ جاتىر.

رەسەي فەدەراتسياسى

كرەمل ەلدەگى ناۋقاستار سانى 400-دەن اسقانىمەن ءالى كۇنگە دەيىن توتەنشە جاعداي جاريالاي قويمادى. ينفەكتسيا انىقتالعان 438 ادامنىڭ 60%-ى، ياعني 262 پاتسيەنت ماسكەۋدە تىركەلگەن. دۇيسەنبى كۇنى استانا مەرى سەرگەي سوبيانين قارتتار مەن سوزىلمالى اۋرۋمەن اۋىراتىن ازاماتتارعا 26 ناۋرىز بەن 14 ءساۋىر ارالىعىندا ۇيدەن شىقپاۋعا ۇسىنىس جاسادى. اتالعان ساناتتاعى تۇرعىندارعا وقشاۋلاۋ شىعىنى رەتىندە ءبىر رەتتىك 4 مىڭ رۋبل تولەنەتىنىن مالىمدەدى.

تۇركىمەنستان

ورتا ازيا جانە كورشىلەس ەلدەرى COVID-19 دەرتى تۋرالى اقپارات تاراتىپ جاتقاندا، اشحاباد تىم-تىرىس وتىر. ۇكىمەت سايتىندا «باۋىرلاس ەل يرانعا» مەديتسينالىق قۇرالدار مەن ازىق-تۇلىك ونىمدەرىن قامتيتىن  گۋمانيتارلىق كومەك كورسەتكەنىن جاريالاعان بيلىك ەلدە ىندەتتىڭ جوقتىعىن ايتادى.

قىتاي

ىندەت وشاعى حۋبەي پروۆينتسياسىنىڭ ورتالىعى ۋحان قالاسىندا ەكى ايعا سوزىلعان قاتاڭ كارانتيننەن كەيىن اۋرۋ تاراۋ قارقىنى ايتارلىقتاي باسەڭدەگەن. وتكەن تاۋلىكتە 39 ادامنىڭ ۆيرۋس جۇقتىرعانى انىقتالىپ، تاعى 9 ناۋقاس اۋرۋ دەندەپ كوز جۇمعان. جالپى جيىنى 81 مىڭداي ادام كوروناۆيرۋس جۇقتىرىپ، ونىڭ 3300-گە جۋىعىنىڭ جاعدايى وڭالماي، قايتىس بولعان. الەمنىڭ ەكىنشى ەكونوميكاسى رەتىندە بەيجىڭ بۇرىن-سوڭدى بولماعان قارجىلىق شىعىنعا ۇشىرادى. ءبىر عانا اۋە تاسىمالى سالاسىندا 40 مىڭعا تارتا رەيس توقتاعان. قىتاي ۇلتتىق دەنساۋلىق ساقتاۋ كوميتەتى كۇننەن-كۇنگە ساۋىعىپ شىققانداردىڭ سانى ءوسىپ جاتقانىن ايتادى.

"The Qazaq Times"