COVID-19 ينفەكتسياسىنىڭ بولجامدى مودەلى. فوتو: دجونس حوپكينس ۋنيۆەرسيتەتىنىڭ جۇيەلىك عىلىم جانە ينجەنەرلىك ورتالىعى (CSSE)

دەنساۋلىق ساقتاۋ مينيسترلىگى قازاقستاندا 17 ناۋرىز ساعات 09.00-دە جاعداي بويىنشا كوروناۆيرۋستىڭ تاعى 3 فاكتىسى انىقتالعانىن حابارلادى.

«الماتىدا كوروناۆيرۋستىق ينفەكتسيانىڭ تاعى ءۇش جاڭا وقيعاسى تىركەلدى. بۇگىنگى تاڭدا ەلىمىزدە كوروناۆيرۋستىڭ 13 جاعدايى راستالدى، ونىڭ 11-ءى الماتىدا، 2-ءى استانادا»، – دەلىنگەن حابارلامادا.

جۇقتىرعانداردىڭ اراسىندا 2018 جىلعى كىنشكەنتاي قىز بالا بار. ول بەرلين-مينسك-الماتى ۇشاعىندا 13 ناۋرىز كۇنى ۇشىپ كەلگەن. قازىر نارەستە الماتىداعى بالالار جۇقپالى اۋرۋلار اۋرۋحاناسىنا جاتقىزىلدى. ەكىنشى جانە ءۇشىنشى ناۋقاس ماسكەۋ قالاسىنان ۇشىپ كەلگەن 1966 جانە 1956 جىلعى ازاماتتار.

قازاقستاندا كوروناۆيرۋستىڭ العاشقى جاعدايى 13 ناۋرىز كۇنى تىركەلدى. ينفەكتسيا انىقتالعان ەكى ازاماتتىڭ ءبىرىنشىسى 9 ناۋرىزدا (ايەل ادام), ەكىنشىسى (ەر ادام) 12 ناۋرىز كۇنى گەرمانيادان كەلگەن.

16 ناۋرىز تاڭەرتەڭگى 8-دەن باستاپ ەلىمىزدە توتەنشە جاعداي رەجيمى ەنگىزىلدى. پرەزيدەنتتىڭ تاپسىرماسىمەن بۇل 30 كۇنگە سوزىلادى. قاجەت بولعان جاعدايدا رەجيم ۇزارتىلۋى مۇمكىن.

"The Qazaq Times"