كوروناۆيرۋس قاۋپىنەن ەلدە جاريالانعان توتەنشە جاعداي كەزىندە حالىقتىڭ ءومىر قاۋىپسىزدىگىن ساقتاۋ ماقساتىندا ساۋدا جانە ينتەگراتسيا مينيسترلىگى ءىرى ويىن-ساۋىق جانە ساۋدا-ساتتىق ورىندارىنىڭ جۇمىس كەستەسى جونىندە مالىمدەمە جاسادى.

«بىرىنشىدەن، ءىرى ساۋدا نىساندارى تاڭعى ساعات 10-نان كەشكى 18:00 دەيىن عانا جۇمىس ىستەگەنى ءجون. وسى ارالىقتا سانيتارلىق قاۋىپسىزدىك تالاپتارى قاتاڭ ساقتالۋى ءتيىس. ساۋدا ورتالىعىنىڭ اۋماعىنداعى كينوتەاتر، بالالار ورتالىعى، كەز كەلگەن ويىن-ساۋىق الاڭدارى جابىلادى. ازىق-تۇلىك دۇكەندەرى، سۋپەرماركەتتەر جانە ازىق-تۇلىك بازارلارى قالىپتى رەجيمدە جۇمىس ىستەي بەرەدى. تەك سانيتارلىق دەزينفەكتسيالىق شارالار كۇشەيتىلەدى. نان جانە كونديتەر ونىمدەرىن تىسى ورالعان كۇيىندە ساتقان دۇرىس. ەكىنشىدەن، ازىق-تۇلىك ساتپايتىن بازارلار تاڭعى 11:00-دەن كەشكى 17:00-گە دەيىن عانا جۇمىس ىستەيدى»، – دەلىنگەن ۆەدومستۆو حابارلاماسىندا.

قازاقستاندا ءبىرىنشى رەت رەسپۋبليكا كولەمىندەگى توتەنشە جاعداي حابارلاندى. سوڭعى دەرەك بويىنشا، ەلدە كوروناۆيرۋس تابىلعان 9 ناۋقاس تىركەلدى.

"The Qazaq Times"