كوروناۆيرۋس «كوۆيد-19» قىتاي شەگىنەن شىعىپ، الەم ەلدەرىنە تارالىپ بارادى. وڭتۇستىك كورەيا، جاپونيا، مالايزيا، يتاليا جانە يران قاتارلى ەلدەردە ۆيرۋستىڭ تارالۋى قورقىنىشتى دەڭگەيگە ءوتتى. گرۋزيا بيلىگى دە ەلدە ۆيرۋس جۇقتىرعان ادامنىڭ تابىلعانىن مالىمدەدى.

مالىمەتكە قاراعاندا، ۆيرۋس جۇقتىرعان گرۋزيا ازاماتى يراننان كەلگەن ەكەن. سوڭعى كۇندەرى يراندا ۆيرۋستان كوز جۇمعاندار سانى 15 ادامنان استى، يتاليادا بولسا سوڭعى تاۋلىك ىشىندە ۆيرۋس جۇقتىرعاندار سانى ءۇش ەسەگە ارتىپ، 453 ادامنىڭ ۆيرۋس جۇقتىرعانى ءمالىم بولدى.

وسى تۇستا قىتايدا 1970 جىلدارى كەڭەس وداعىندا شىعارىلعان «اربيدول» پرەپاراتىن كوپتەپ ساتىپ الا باستادى. وتكەن اپتادا قىتايدىڭ دەنساۋلىق ساقتاۋ مينيسترلىگى «كوۆيد-19» ۆيرۋسىنا قارسى امالداردىڭ ءبىرى رەتىندە وسى «اربيدول» پرەپاراتىن ۇسىنعان بولاتىن. وسىدان كەيىن قىتايدا «اربيدولعا» سۇرانىس تا، باعا دا ارتتى. قىتاي ۇكىمەتى دە كوپ مولشەردە ساتىپ العان. بىراق، اتالعان پرەپاراتتان ۆيرۋس جۇقتىرعانداردىڭ جازىلعانى تۋرالى انىق دەرەك جوق.

رەسەيدە «اربيدول» كوروناۆيرۋسقا قارسى كۇرەستە ءونىمدى بولادى دەگەن اقپارات تاراعاننان كەيىن 29 قاڭتاردان 18 اقپانعا دەيىن ءدارىنىڭ قۇنى 18 پايىزعا ءوسىپ كەتتى. ال، 25 اقپاندا رەسەيدىڭ مونوپولياعا قارسى فەدەرالدىق قىزمەتى ماقساتتى تۇردە «اربيدول» وندىرگەن «وتيسفارم» كومپانياسىنا ايىپپۇل سالدى، سەبەبى، كومپانيا «اربيدولدى» كوروناۆيرۋسقا قارسى كومەكتەسەدى دەگەن مازمۇندا راديودان جارناما تاراتقان.

اتالعان ءدارى بۇعان دەيىن بۇنشالىق تانىمال بولعان ەمەس. قىتاي باسىلىمدارى دا ءتۇرلى پىكىردە ساراپتامالار تاراتىپ جاتىر. كەيبىر ساراپشىلار بۇنى قىتاي ۇكىمەتىنىڭ حالىققا ءۇمىت بەرۋ ءۇشىن ماقساتتى تاراتقان قاۋەسەتى دەپ تە جاتىر. پرەپاراتقا قاتىستى تەست تە جۇرگىزىلىپ ۇلگىرگەن، تەست ناتيجەسى سونشالىقتى جاقسى بولماعان. دەگەنمەن، مەديتسينا ماماندارى سىناقتىڭ ءالى دە جالعاسىپ جاتقانىن ايتادى.

 

“The Qazaq Times”