كەشە, اقپاننىڭ 25-ىنە قاراعان ءتۇنى پوليتسيا فورماسىنسىز كەلگەن ءبىر توپ ۇيىنەن كۇشتەپ اكەتىپ، بۇگىن تاڭدا تەرگەۋ يزولياتورىندا «جۇرەك تالماسىنان» كوز جۇمدى دەپ حابارلانعان دۋلات اعادىلوۆتىڭ قازاسىنا بايلانىستى ىشكى ىستەر مينيسترلىگىنىڭ رەسمي ۋاكىلى ارنايى مالىمدەمە جاسادى.
استاناداعى پوليتسيا دەپارتامەنتىنىڭ ءباسپاسوز ءماسليحاتىندا ۆەدومتسۆو ۋاكىلى:
«24 اقپان كەشكى 21:00 سوت قاۋلىسىن ورىنداۋ ماقساتىندا تالاپكەر ەلدى مەكەنىنىڭ 1977 جىلى تۋعان ازامات دۋلات اعادىلوۆ ەمحاناعا جەتكىزىلگەن. جاسالعان ساراپتاما ناتيجەسىندە قان قۇرامىندا ورتا دارەجەدە الكوگول بار ەكەنى، دەنە جاراقاتى جوقتىعى انىقتالدى. تۇنگىساعات 00:00 تامان قىلمىستىق اتقارۋ جۇيەسىنىڭ 166/1 مەكەمەسىنە جەتكىزىلدى، كامەراعا وقشاۋلاردا ودان ەشقانداي شاعىم تۇسپەگەن. كامەرادا قاسىندا ءتورت ازامات وتىرعان. تاڭعى 6:00-دە ۇيقىدان تۇرعان سوڭ تاماقتانىپ، بۇگىن ساعات 7:00 شاماسىندا دارەتحانادان شىققاننان كەيىن ەسىنەن تانىپ، قۇلاپ قالعان. كامەراداعىلار باقىلاۋشىعا حابارلاسىپ، العاشقى مەديتسينالىق جاردەم كورسەتىلدى. جەدەل جاردەم كەلگەندە ول كوز جۇمعان. بەينەباقىلاۋ جازباسىنا قاراعاندا، ول ۇيىقتاي الماي، مازاسىزدانعانى انىقتالعان.
دەنەسىنەن زورلىق-زومبىلىق ارەكەتى بايقالمايدى. كامەرالاس تۇتقىندار مارقۇمنىڭ ماس كۇيدە بولعانىن، ەشقانداي كيكىلجىڭ بولماعانىن جەتكىزدى. ساراپشىلاردىڭ ازىرگە قويىپ وتىرعان دياگنوزى – جۇرەك قان تامىرلارىنىڭ جەتىسپەۋشىلىگى»، – دەپ حابارلادى.
مارقۇم اعادىلوۆتى بۇرىن سوڭدى «جۇرەك تالماسىمەن» اۋىرماعانىن ايتقان بەلسەندىلەر بۇگىن تۇستە استانادا، الماتى جانە شىمكەنت قالاسىندا نارازىلىققا شىقتى. ەلوردادا ەلۋگە جۋىق بەلسەندىنى پوليتسيا دەپارتامەنتى باستىعىنىڭ ءبىرىنشى ورىنباسارى باقىتجان مالىباەۆ باستاعان جاساق ءتورت اۆتوبۋسقا كۇشپەن تيەپ الىپ كەتكەن ەدى.
پروتوكول تولتىرماعان، كۋاگەر تارتىلماعان، ادۆوكات شاقىرتپاي كۇشتەپ ۇستاپ اكەتتى دەيدى اشىنعان ازاماتتىق بەلسەندىلەر. ايماقتاعى نارازىلار «نۇرسۇلتان جانە داريعا نازارباەۆتاردىڭ، ەرلان تۇرعىمباەۆتىڭ وتستاۆكاسىن»، «اعادىلوۆتىڭ ءولىمىن ءادىل تەكسەرسىن» دەگەن تالاپتار قويدى. قۇرال سەيىتحانۇلى مارقۇم «ءوز اۋرۋىنان نەمەسە سپيرتتىك ىشىمدىك ءىشىپ ءولدى دەگەن جالعان جەلەۋمەن» اقتالۋعا تىرىسادى دەپ سانايدى. بەلسەندىنىڭ ءبىرى «حالىقتىق رەپرەسسياعا قاتىسقان، اتسالىسقان مينيستردەن قاتارداعى ساربازعا دەيىن جازالاناتىنى حالىقارالىق قۇقىقتىق قاتىناس قۇجاتتارىندا قاراستىرىلعان» دەيدى. ول دۋلات اعادىلوۆتى دە «حالىقتىق قۋعىن-سۇرگىننىڭ قۇربانى» دەپ اتادى.
الماتىلىق بەلسەندىلەر 1 ناۋرىز ساعات 12:00-دە گاندي ساياباعىندا ميتينگكە رۇقسات بەرمەگەنىنە قاراماستان، دۋلات اعادىلوۆتىڭ قازاسى مەن بۇعان دەيىن ۇستالعان بەلسەندىلەردى بوساتۋدى تالاپ ەتۋ ماقساتىندا شەرۋگە شىعاتىنىن مالىمدەدى.
الماتى وبل پركۋراتۋراسى. بەلسەندىلەر: «جالعان جالامەن قاماۋداعى ايگەرىم مەن دۋمانعا بوستاندىق!»
ارمان الىمبەكوۆ: مەن ول جەردىڭ رەزيدەنتسيا ەكەنىن بىلمەدىم. ەشنارسە بۇلدىرمەدىم.
قوساي ماحامباەۆ: وق تيگەن ادامدى قۇتقارام دەگەندە ءوزىمدى اتىپ تاستادى
رەزيدەنتسيا ءىسى. ورىنعازى سەرىكبول: بەيبىت شەرۋگە شىقتىم. ال، 269 باپتى مويىندامايمىن
كيبەرشابۋىلعا ۇشىراعان باق وكىلدەرى قۇقىق قورعاۋ ورگاندارىنا ارىز ءتۇسىردى