بۇرىننان تانىس سەرىك ءزاينۋلديندى قايتا تانىستىرۋ جيىنىنان. فوتو: التاي حابارى

بۇگىن شقو اكىمى دانيال احمەتوۆ شۋ شىققان اۋداننىڭ اكىمىن «بەلگىسىز سەبەپپەن» اۋىستىردى.

وسىعان دەيىن ەكى مارتە زايسان اۋدانىن باسقارعان سەرىك زينابەكۇلى زاينۋلدين ءۇشىنشى رەت ەسكى بىلعارى كرەسلوسىنا جايعاستى. ال اۋداندى ون ايداي باسقارعان سەرىك اقتانوۆ جەرگىلىكتى اكىمدىك ءتۇسىندىرۋ جۇمىستارىن ۋاقىتىندا جۇرگىزبەدى دەگەن ۋاجبەن اتتان تۇسكەن.

19 اقپاندا شىعىس قازاقستان وبلىسىنىڭ قيىر شىعىسىنداعى زايسان اۋدانىنا قاراستى سارىتەرەك جانە اينابۇلاق اۋىلىنىڭ تۇرعىندارى اۋىل امبۋلاتورياسىنىڭ الدىنا جينالىپ، نارازىلىق بىلدىرگەن بولاتىن. ولار الەۋمەتتىك جەلىلەردە تاراعان «زايسان اۋدانىندا ءبىر توپ ادام كوروناۆيرۋس جۇقتىردى. قىتايمەن شەكارادا ينفەكتسيا جۇقتىرعان ادامداردى اۋىل امبۋلاتورياسىندا ەمدەۋ ءۇشىن الىپ كەلەدى» دەگەن اقپاراتتى ەستىپ، ءمان-جايدى ءبىلۋ ءۇشىن جينالعان. سونداي-اق مۇنداي شەشىمگە ءۇزىلدى-كەسىلدى قارسى ەكەنىن ايتقان.

الەۋمەتتىك جەلى قولدانۋشىلارى اۋىس-ءتۇيىستىڭ سەبەبىن «حالىقتى كوشەگە شىعارىپ الۋىمەن»، «زايسانعا جاتقىزىلماق بولعان قىرىق شاقتى قىتايدىڭ ەلگە ءمالىم بولىپ قالۋىمەن» بايلانىستىرادى.

;feature=emb_title

سەرىك زاينۋلدين 1964 جىلعى 25 اقپاندا زايسان اۋدانىنىڭ زايسان قالاسىندا تۋعان. 1981 جىلى اينابۇلاق ورتا مەكتەبىن ءتامامدادى.

  • 1981-1986 جىلدارى – سەمەي زووۆەتەرينارلىق ينستيتۋتى زووتەحنيكالىق فاكۋلتەتىنىڭ ستۋدەنتى;
  • 1986-1991 جىلدارى زايسان اۋدانىنداعى «اينابۇلاق» كەڭشارىندا باس زووتەحنيك بولىپ جۇمىس ىستەدى;
  • 1991-1993 جىلدارى – «اينابۇلاق» كەڭشارىنىڭ ديرەكتورى، 1997 جىلعا دەيىن - اۋداندىق اۋىلشارۋاشىلىق باسقارماسىنىڭ باستىعى;
  • 1997-2004 جىلدارى سەرىك زينابەكۇلى زايسان اۋدانى اكىمىنىڭ اۋىل شارۋاشىلىعى، قۇرىلىس جانە تۇرعىن ءۇي-كوممۋنالدى شارۋاشىلىق ماسەلەلەرىنە باسشىلىق ەتەتىن ورىنباسارى;
  • 2004-2005 جىلدارى زايسان اۋدانى اكىمىنىڭ مىندەتىن اتقارۋشى قىزمەتىندە بولدى;
  • 2007-2010 جىلدارى كاتونقاراعاي اۋدانىنىڭ اكىمى;
  • 2010-2013 جىلدارى زايسان اۋدانىنىڭ اكىمى قىزمەتتەرىن اتقاردى;
  • 2013 جىلدىڭ 28 ماۋسىمىنان بەرى ءۇرجار اۋدانىنىڭ اكىمى قىزمەتىن اتقارىپ كەلگەن.

"The Qazaq Times"