قىتاي استاناسىندا اۆتوكولىك ساتىپ الۋ ءۇشىن نەكەگە تۇراتىندار كوبەيىپ كەلەدى

باتىس ەلدەرىندە ۇيلەنۋ تويلارى مۇلدە قاراپايىم وتەدى. امەريكالىقتار مەن وزگە دە باتىس ەلدەرى ءۇشىن، قىتايدا نەكە كوپتەگەن تيىمدىلىكتى اكەلەتىندەي كورىنەدى. ايتالىق دوستار مەن تۋىستاردىڭ ۇسىنعان تويلىقتارى، قىز جاقتىڭ بەرەتىن جاساۋى، كۇيەۋ جاقتىڭ جاڭا ءۇي ساتىپ الۋى ت.ب. بىراق بەيجىڭ قالاسىندا نەكەنىڭ وزگە ءبىر يگىلىگى بار. ول – اۆتوكولىك نومەرىنە قول جەتكىزۋ. 

قازىرگى كەزدە قىتايدا اۆتوكولىك ساتىپ الا الاتىن نەشە ءجۇز ميلليونداعان ادام بار. بىراق ۇلكەن قالالاردا اۆتوكولىكتى تىركەتۋ مەن نومەرىن الۋ اسا قيىن. سەبەبى، قىتايدىڭ ءىرى قالالارىندا اۆتوكولىكتەر سانى قالىپتان تىس كوبەيىپ كەتكەن. قىتاي استاناسىندا ءومىر سۇرەتىن كوپتەگەن ادامدار ءۇشىن نەكە –   اۆتوكولىكتىڭ ليۋكس نومەرىنە قول جەتكىزۋدەي باقىتىنا يە ەتەتۋشى سانالادى. سەبەبى، بەيجىڭدەگى اۆتوكولىكتىڭ سانىنىڭ شەكتەن تىس ارتىپ كەتۋىنەن ۇكىمەت كولىك نومەرىن الۋدى قيىنداتقان. الايدا، زاڭدى نەكەگە تۇرعان ەرلى-زايىپتىلار ءبىر-بىرىنە اۆتوكولىك نومەرىن وتكەرمەلەپ بەرۋىنە بولادى دەگەن ەرەجە بار.

بەيجىڭ قالاسىندا اۆتوكولىك نومەرىن جىلىنا التى-اق رەت تاراتادى. ءار رەتتەگى نومەر سانى شەكتى. ميلليونداعان اۆتوكولىك نومەرىن العىسى كەلەتىندەر ءۇشىن بۇل وراي تىم ازدىق ەتەدى. سوڭعى رەت اقپان ايىندا ءبىر رەت نومەر تاراتىلدى. وعان قاتىسقان نومەر الۋشىلاردىڭ سانىنا ەسەپتەگەندە، ءار ادامنىڭ اۆتوكولىك نومەرىنە قول جەتكىزۋ ىقتيمالدىعى نە بارى 0,1269% بولعان.  وسىنىڭ وزىنەن-اق بەيجىڭ قالاسىندا اۆتوكولىك نومەرىنە قول جەتكىزۋدىڭ قانشالىقتى قيىندىعىن بىلۋگە بولادى.

ءۇش جىل بويى اۆتوكولىگىنە نومەر الا الماعان، بەيجىڭدە تۇراتىن شىنجاڭدىق لي ەسىمدى ازامات، ءوزى قولداناتىن الەۋمەتتىك جەلى پاراقشاسىنا: «ءۇش جىلدان بەرى كەزەك كۇتىپ كولىك نومەرىن الا المادىم. ەگەر نەكەگە تۇرۋ ارقىلى كولىك نومەرىن وتكەرمەلەپ بەرەتىن ايەل بولسا، اقىسىن تولەر ەدىم»، – دەپ اشىق جازىپتى. ونىڭ سوزىنەن اشىنۋ مەن كەيىستىك تە اڭعارىلادى. قازىر قىتاي استاناسىندا كولىك ساتىپ الۋ ءۇشىن نەكەگە تۇرۋشىلار بارعان سايىپ كوبەيىپ كەلەدى. بۇل اۆتوكولىك ساتىپ الۋشىلار اراسىندا قالىپتى قۇبىلىسقا اينالدى.

“The Qazaq Times”