ەسكى ادەت: داۋرەن اباەۆ ينتەرنەتتىڭ بۇعاتتالۋى تۋرالى

الماتىدا اقپارات جانە قوعامدىق دامۋ ءمينيسترىءنىڭ قاتىسۋىمەن وتكەن ميتينگ تۋرالى ازاماتتىق بەلسەندىلەر جيىنىنان سوڭ، داۋرەن اباەۆ ينتەرنەتتىڭ بۇعاتتالۋى تۋرالى پىكىر ءبىلدىردى.

بەيبىت شەرۋ-پيكەت وتكىزۋ جانە ۇيىمداستىرۋ ءتارتىبى جونىندەگى زاڭدى جەتىلدىرۋ ماسەلەسى شيكى تالقىلانعاننان كەيىن اقپارات ءمينيسترى اباەۆ جۋرناليستەرگە سۇحبات بەردى. ول سوڭعى بىرنەشە كۇن بويى ينتەرنەت كەڭىستىگىندەگى نەگىزگى رەسۋرستارعا كىرۋدىڭ قيىنداۋىنا اتالعان ۆەدومستۆونىڭ ەش قاتىسى جوقتىعىن مالىمدەدى.

ءمينيستىردىڭ ايتۋىنشا، «ينتەرنەتتىڭ نەلىكتەن بۇعاتتالعانىن سول سالاعا قۇزىرەتى بار ورگاننان سۇراۋ كەرەك. ال، اقپارات جانە قوعامدىق مينيسترلىگىنىڭ بايلانىس سالاسىنداعى قۇزىرى وسىدان ءبىر جىل بۇرىن الىنىپ قالعان».

دەگەنمەن قوردالانعان قالىڭ سۇراقتىڭ استىندا قالعان اباەۆ ينتەرنەت بايلانىسىن بۇعاتتاۋ نە قايتا قالپىنا كەلتىرۋگە جاۋاپتى ۆەدومستۆونىڭ اتىن اتامادى.

كەشە، 16 اقپان اقوردا حاتشىسى بەرىك ءۋالي facebook جەلىسىندەگى رەسمي پاراعىندا «پرەزيدەنت قاسىم-جومارت توقاەۆ ميۋنحەندە جۇمىس ساپارىمەن جۇرگەندە قازاقستاننىڭ ينتەرنەت جەلىسىندەگى اقاۋ جايىندا حاباردار بولدى. مەملەكەت باسشىسى بارلىق اقپاراتتىق رەسۋرستاردىڭ جۇمىسىن قالپىنا كەلتىرۋدى تاپسىردى» دەپ جازعان ەدى.

وتكەن اپتانىڭ بەيسەنبىسى، ياعني 13 اقپان كەشكىسىنەن بەرى قازاقستاندا Telegram مەسسەندجەرىنە حات الماسۋ مۇمكىندىگى كىدىرىڭكىرەدى. ءتىپتى ۇيالى بايلانىس وپەراتورلارى مەن ينتەرنەت-پروۆايدەرلەر ارقىلى قولدانۋ قيىندادى. ءار كەزدە ارقالاي بولماشى مەزگىلگە، بىرنەشە مينۋت قانا قولجەتىمدى بولدى. كەيىننەن قىزمەت قايتا ءۇزىلدى.

ال جەكسەنبىدە ەلدەگى Google ىزدەۋ جۇيەسىنە، Gmail پوشتاسىنا، YouTube ۆيدەوحوستيڭىنە كىرۋ قيىنداپ، Android تۇتىناتىن قازاقستاندىقتاردىڭ PlayMarket قىزمەتى بۇعاتتالدى. ءتۇس اۋا، ساعات 15: 00-دەن كەيىن بارلىق رەسۋرس قايتا قولجەتىمدى بولدى.

بۇل ەلدەگى ينتەرنەتتىڭ ءبىرىنشى رەت بۇعاتتالۋى ەمەس. ءارتۇرلى وزەكتى ساياسي وقيعالار تۇسىندا نەمەسە سانكتسيالانباعان جيىن-ميتينگتەر كەزىندە ەشقانداي رەcمي مالىمدەمە-ەسكەرتۋسىز ينتەرنەت قىزمەتىن قولدانۋ قيىنداپ، تور رەسۋرستار بۇعاتالىپ جاتادى.

"The Qazaq Times"