«ادۆوكات» اقپارات مينيستر: …ەلدى 30 جىلدا قازىرگىدەي دەڭگەيگە كوتەرۋ كىمنىڭ قولىنان كەلەدى؟

ايسۇلتان نازارباەۆتىڭ الەۋمەتتىك جەلىدەگى پاراعىندا جاريالانعان كەزەكتى جازبادان سوڭ، اقپارات جانە قوعامدىق دامۋ ءمينيسترى داۋرەن اباەۆ دەرەۋ پىكىر ءبىلدىردى.

13 اقپاندا حابار ارناسىنداعى «وتكرىتىي ديالوگ» باعدارلاماسىندا قازاقستان بيلىگىنەن العاش رەت سوڭعى كەزدەرى قوعامدا زور تالقىعا اينالعان ايسۇلتاننىڭ جازبالارى تۋرالى «ساراي كوزقاراسىن» كەسىمدى جەتكىزگەن اباەۆ «ونىڭ جازعانىنان گورى دەنساۋلىعىنا الاڭدايدى».

جازباعا ءمان بەرمەيتىنى – ونى «الدەبىر ادامداردىڭ مانيپۋلياتسياسىنىڭ ىقپالىمەن جازىپ وتىر» دەپ سانايدى.

بيلىك وكىلدەرىنىڭ شالىس نە جاڭساق ايتقان ءسوزىن ءجيى «تاپسىرلەپ، قايتا تۇسىندىرەتىن» مينيستر العاش رەت رەسمي تۇردە ءسوز بولعان تاقىرىپتى «جاباتىن ۋاقىت كەلدى، ءبىرىنشى پرەزيدەنتتىڭ جيەنى بولعانى ءۇشىن عانا تاۋەلدى ادامنىڭ قيالىنان سپەكۋلياتسيا جاساۋ – ادىلەتسىز، مورالعا سىيمايدى. ...بۇل وقيعالار نۇرسۇلتان نازارباەۆتى ديسكرەديتاتسيالاۋ امالى، لاس ويىن» دەدى.

مەملەكەتتىك باق-پەن قويان-قولتىق جۇمىس ىستەيتىن، ازاماتتىق جۋرناليستيكانىڭ ماسەلەلەرىنە جەتكىلىكتى دەڭگەيدە مويىن بۇرا بەرمەيتىن اقپارات ءمينيسترى اقسارايدىڭ «التىن جولاقتى ارناسىنا» بەرگەن سۇقباتىندا «كەيبىر توپتار جالعان اقپارات تاراتىپ، ۇلكەن كومپانيالاردىڭ، جەكە ادامداردىڭ، ءتىپتى ءبۇتىن ءبىر ەلدىڭ ابىرويىنا نۇقسان كەلتىرىپ جۇرگەنىن كورىپ ءجۇرمىز. بىراق مۇنىڭ ارتىندا جىمىسقى وي، پايدا كورۋ نيەتى تۇرادى جانە مۇنداي مىسالدار سوڭعى ۋاقىتتا ءبىزدىڭ ەلدە دە كوبەيىپ كەلەدى. مۇنىڭ سوڭى ارانداپ قالۋعا اكەلۋى مۇمكىن. ايسۇلتانعا قاتىستى دا وسىنى ايتقىم كەلەدى. بۇل – ءبىرىنشى كەزەكتە ونىڭ اناسىنىڭ تراگەدياسى. انا ءۇشىن بالاسىنان اسقان قانداي قىمبات نارسە بولۋى مۇمكىن؟ كەيبىرەۋلەر وسى وقيعاعا ەلباسىن دا ارالاستىرعىسى كەلەدى. شۋ جاساپ، ەلدى دۇرلىكتىرۋگە تىرىسادى. بىراق حالىقتىڭ باعىنا تۋعان جاقسىمىزدى قاڭقۋ سوزگە قالاي قيامىز؟ ءوزىڭىز ويلاڭىزشى، ەكونوميكاسى قۇلدىراعان، جوق بوپ كەتكەن، ءوندىرىسى توقتاعان ەلدى 30 جىلدا قازىرگىدەي دەڭگەيگە كوتەرۋ كىمنىڭ قولىنان كەلەدى؟» دەدى.

بىلتىر قازاندا لوندوندا جەرگىلىكتى پوليتسەيگە قارسىلىق تانىتىپ، ءىستى بولعان، كەيىننەن الەۋمەتتىك جەلىدە، اقپارات قۇرالدارىندا ۆيدەو-ءماتىن فورماتىندا «بيلىك اۋلەتىنىڭ» ءارتۇرلى ىشكى-مەملەكەتتىك ماسەلەلەرى بويىنشا اتىشۋلى مالىمدەمە جاساپ جۇرگەن ايسۇلتان نازارباەۆتىڭ ارەكەتىنە بايلانىستى وتباسى مۇشەلەرى ەشقانداي پىكىر بىلدىرمەدى.

اقپارات ءمينيسترى اباەۆتىڭ پىكىرى تۋرالى ازاماتتىق قوعام وكىلدەرى «سارايدىڭ ادۆوكاتى»، «ءالسىز ارگۋمەنتپەن اسپەتتەۋ»، «پوستكەڭەستىك ەلدەردىڭ ءبارى نولدەن باستادى، تەك قازاقستان ەمەس» دەگەن سارىندا سيپاتتاي باستادى.

“The Qazaq Times”