جاڭا كوروناۆيرۋسقا بايلانىستى جەنەۆادا وتكەن دۇنيەجۇزىلىك دەنساۋلىق ساقتاۋ ۇيىمىنىڭ ەكى كۇندىك جينالىسى بۇگىن اياقتالدى. بىلتىر جەلتوقسان ايىندا قىتايدىڭ ۋحان قالاسىندا باستاپ تاراعان جاڭا ۆيرۋسقا رەسمي تۇردە COVID-19 دەگەن ات بەردى. سەيسەنبىدە اتالعان ۆيرۋستان كوز جۇمعاندار سانى مىڭنان استى.

دۇنيەجۇزىلىك دەنساۋلىق ساقتاۋ ۇيىمى جاڭا ۆيرۋسقا بايلانىستى مالىمەتتەردەن كەشىگىپ حاباردار بولعانىن مويىندادى. ۇيىم جەتەكشىسى تەدروس گەبرەيسۋس سوزىندە: «قازىر ۇكىمەتتەر، قارجى بازارى مەن ساياساتكەرلەر الاڭداپ وتىرعان بۇل قاۋىپتى ۆيرۋس تۋرالى ەكى اي بۇرىن ءبىز ەشتەڭە دە بىلمەيتىن ەدىك»، – دەدى. سونداي-اق، ول ماسەلەگە قاتىستى كوپتەگەن سۇراقتاردىڭ جاۋابىن تابا الماعاندارىن دا مويىندادى.

«ىندەت وشاعى قايدا؟ ونىڭ تارالۋ ديناميكاسى قانداي؟ ناۋقاس قانشا ۋاقىتقا دەيىن ۆيرۋستى وزىمەن الىپ جۇرەدى؟ دياگنوستيكا جانە داۋالاۋ ءۇشىن ۆيرۋستىڭ قانداي ۇلگىسىن قولدانۋ كەرەك؟ اۋىر ىندەتپەن قايتىپ كۇرەسۋ كەرەك؟ مىنە، بۇل ۆيرۋستى تىزگىندەۋ ءۇشىن وسى سۇراقتارعا جاۋاپ تابۋ كەرەك»، – دەگەن.

ۇيىم جەتەكشىسى تەدروس گەبرەيسۋس. فوتو: رەيتەر.

وتكەن اپتانىڭ سوڭىندا قىتاي ۇكىمەتى ينفەكتسياعا شالدىققاندار سانى تۇراقتالىپ قالعانىن ايتىپ ەدى. الايدا، وسى اپتا قايتا كۇشەيە تۇسكەن.

جاڭا قاۋىپتى ۆيرۋسقا قارسى ۆاكتسيناسى ءالى تابىلمادى. سوندىقتان دا، الەمنىڭ 400-دەن استام مەديتسينا عالىمى جەنەۆادا جينالىپ ەكى كۇن تالقى وتكىزدى. قىتاي دەنساۋلىق ساقتاۋ مينيسترلىگىمەن جەنەۆادا ۆيدەو بايلانىس ارقىلى ورتاق كەڭەس وتكىزدى.

مەديتسينا ماماندارىنىڭ مالىمەتىنە سەنسەك، COVID-19 ۆيرۋسىنىڭ ۆاكتسيناسىن جاساپ شىعۋ ءۇشىن ءبىر جارىم جىل ۋاقىت ساراپتاۋدان وتكىزۋ كەرەك ەكەن. بۇل مەزگىلگە دەيىن ينفەكتسيانىڭ تارالۋىن بارىنشا تەجەۋ شارالارىن تىنباي جالعاستىرۋ كەرەك.

“The Qazaq Times”