تۇركيا يدليبتەگى اسكەرىن كوبەيتتى. فوتو: RTR.NET

دۇيسەنبىدە ءسۇريا ارمياسى ەلدىڭ سولتۇستىك-باتىسىنداعى يدليب پروۆينتسياسىنداعى تۇركيا اسكەري كۇشتەرىن نىساناعا العان بولاتىن. ناتيجەسىندە بەس تۇرىك اسكەرى قازا تاپتى. تۇركيادا ءوز كەزەگىندە ءسۇريا كۇشتەرىنە باعىتتاپ زىمىراندار اتتى. كەشە تۇركيا پرەزيدەنتى ەردوعان وسى قاقتىعىسقا قاراتا جاساعان مالىمدەمەسىندە داماسك بۇل ارەكەتى ءۇشىن «ەسەلەپ جاۋاپ الاتىن بولادى» دەدى.

سۇرياداعى وپپوزيتسيالىق كەيبىر توپتاردى قولداعان تۇركيا 2017 جىلى استانا پروتسەسىندە جانە سوچيدەگى باس قوسۋدا باشار اسساد رەجيمىن قولداپ تۇرعان رەسەي جانە يران ەلدەرىمەن پىكىر بىرلىگىنە كەلگەن بولاتىن. كەلىسىمگە ساي تۇركيا وزىنە جاقىن شەكارالىق ايماق يدليبكە اسكەر جونەلتىپ سول ايماقتىڭ قاۋىپسىزدىگىن ءوز باقىلاۋىنا العان بولاتىن.

اقپان ايى تۋا سالىسىمەن ءسۇريا ۇكىمەت كۇشتەرىنىڭ تۇرىك اسكەرىنە قارسى ارەكەتتەرى جيىلەپ كەتتى. اقپان ايىنىڭ وزىندە ءسۇريا ارمياسىنىڭ ارتيللەريالىق شابۋىلدارىنان 12 تۇرىك اسكەرى جانە ءبىر ازاماتى قازا تاپتى. بۇعان جاۋاپ رەتىندە تۇركيا ءسۇريانىڭ 115 ۇكىمەتتىك عيماراتتارىن نىساناعا الىپ، 101 سۇريالىق جاۋىنگەردىڭ كوزىن جويعانىن ايتتى. ادام شىعىندارى تۋرالى ءسۇريا مالىمەت تاراتپادى.

«سۇرياعا دەرەۋ جاۋاپ قايتاردىق جانە رەسمي ادامدارىنا نارازىلىعىمىزدى جەتكىزدىك. اسىرەسە، يدليب ايماعىندا پارمەندى سوققى جاسادىق، بىراق بۇل جەتكىلىكتى ەمەس، ولار تۇرىك اسكەرلەرىنە شابۋىل جاساعان سايىن ەسەلەنگەن جاۋاپ الىپ وتىرادى. ءبىز بۇنى اشىق ەسكەرتەمىز»، – دەدى تۇركيا پرەزيدەنتى رەجەپ تايىپ ەردوعان.

بريتانيا اقپارات كوزدەرىنىڭ مالىمەتىنە قاراعاندا ءسۇريانىڭ ۇكىمەت كۇشتەرى كوتەرىلىسشى اسكەري توپتاردان داماسك پەن الەپپو قالالارىن تۇتاستىراتىن كۇرە جولدى قايتارىپ الۋعا ارەكەت ەتۋدە. ەگەر بۇل جول ۇكىمەتتىڭ قاراماعىنا وتەتىن بولسا يوردانياعا دەيىنگى شەكارا تولىقتاي ۇكىمەتتىڭ باقىلاۋىنا وتپەك. بىراق، داماسك بۇل مالىمەتتەردى راستامادى.

قازىر تۇركيا يدليب ايماعىنداعى اسكەرلەرى مەن اسكەري تەحنيكالارىن كوبەيتۋدە. وتكەن اپتانىڭ وزىندە مىڭداعان اسكەر مەن جۇزدەگەن تانك يدليبكە جىبەرگەن بولاتىن. وسى اپتادا دا قوسىمشا ارنايى دايىندىقتاعى اسكەرلەرىن اتتاندىردى.

“The Qazaq Times”