فوتو: www.advantour.com

اشعابادتا تۇراقتى تىركەلمەگەن، ايماقتاردان كەلىپ جۇمىس ىستەپ جۇرگەن ازاماتتار شىعارىلىپ جاتىر. بۇل تۋرالى ازاتتىقتىڭ تۇركىمەن قىزمەتى حابارلادى.

اقپاراتقا قاراعاندا، وتكەن اپتادا بيلىك وكىلدەرى قالاداعى مەملەكەتتىك مەكەمەلەرگە رەيد جۇرگىزىپ، اشعابادتا تۇراقتى تىركەلمەگەن قىزمەتكەرلەردى جۇمىستان شىعارۋدى تالاپ ەتكەن.

"دۇيسەنبى كۇنى بىرنەشە مەكەمە ايماقتاردان كەلىپ ىستەپ جاتقان قىزمەتكەرلەرىن جۇمىستان شىعاردى", - دەيدى ءتىلشى.

تۇركىمەنستاندا ايماقتاردان كەلگەن، تۇراقتى تىركەلمەگەن ازاماتتاردى ەل استاناسىنان شىعارۋ سوڭعى جىلدارى جۇيەلى ىسكە اينالعان. مۇنداي كورىنىس كوبىنەسە مەملەكەتتىك ءمانى بار مەيرامدار مەن ءىس-شارالار الدىندا بايقالادى.

تۇركىمەنستاندا حالىق سانى، ميگراتسيا تۋرالى رەسمي ستاتيستيكالىق مالىمەتتەر اشىق جاريالانبايدى.

“The Qazaq Times”