يزرايل ءوزىنىڭ زاڭسىز جاۋلاپ العان باتىس جاعالاۋ ءوڭىرىن ساياسي كارتالارىنا ەنگىزە باستادى. بۇل تۋرالى سول ەلدىڭ پرەمەر-ءمينيسترى بەنيامين نەتانياحۋ مالىمدەدى. ول سونداي-اق، اقش پرەزيدەنتى دونالد ترامپ العا قويعان «بەيبىتشىلىك جوسپارى بويىنشا» باتىس جاعالاۋداعى كەيبىر جەرلەر تولىقتاي يزرايل يەلىگىنە وتەتىنىن جەتكىزدى.

«ءبىز قازىردىڭ وزىندە بۇل ايماقتاردى كارتاعا ءتۇسىرىپ جاتىرمىز. پرەزيدەنت ترامپ ۇسىنعان جوسپار بويىنشا كوپ وتپەي بۇل ايماق ءيزرايلدىڭ يەلىگىنە اينالادى. بۇعان كوپ ۋاقىت كەتپەيدى»، – دەدى نەتانياحۋ. ونىڭ ايتۋىنشا بۇل ايماققا ءيزرايلدىڭ بارلىق ەلدى مەكەندەرى جانە يوردان القابى كىرەدى.

اتالعان ايماق 1967 جىلى يزرايل تارابىنان قارۋلى كۇشپەن باسىپ الىنعان. سودان بەرى يزرايل قارۋلى كۇشتەرىنىڭ باقىلاۋىندا. ال، پالەستينا ازاماتتارى بۇل ايماقتا دەربەس پالەستينانى قۇرىپ شىققىسى كەلەدى.

پالەستينانى ازات ەتۋشى ۇيىمدار يزرايل پرەمەرىنىڭ كەزەكتى مالىمدەمەسىن ايىپتاپ مالىمدەمە تاراتتى. ولار مالىمدەمەسىندە: «پالەستينادا تەك ءبىر عانا ساياسي كارتا بار، ول 1967 جىلعى دەربەس پالەستينا كارتاسى»، – دەگەن.

ءيزرايلدىڭ بۇل ايماقتى اننەكتسيالاي الۋ، الماۋى بەلگىسىز. بىراق، قۇراما شتاتتارمەن بىرلەسە قارقىندى قادامدار جاساپ جاتىر. پالەستينا جەرىن باسىپ الۋ جانە اننەكتسيالاۋعا بايلانىستى حالىقارالىق قاۋىمداستىق يزرايل ۇكىمەتى ايىپتاپ كەلەدى.

“The Qazaq Times”