شىمكەنتتە شەتەلدىك نومىرمەن جۇرگەن كولىك يەلەرىنىڭ نارازىلىق اكتسياسى ءوتتى. 20 قاڭتار 2020 جىل. فوتو: otyrar.kz

«ورال اپتالىعى» باسىلىمى مەن الەۋمەتتىك جەلىلەردە كەدەن وداعى ەلدەرىنەن اكەلىنگەن اۆتوكولىك يەلەرى اي سوڭىندا جاپپاي شەرۋ وتكىزەتىنى تۋرالى حابارلاندىرۋ جاريالاندى.

31 قاڭتار استانا ۋاقىتىمەن  ساعات 15.00-گە (ورال ۋاقىتى بويىنشا 16.00) جوسپارلانعان جيىنعا اقتاۋ، جاڭاوزەن، اقتوبە، الماتى، اتىراۋ، قاراعاندى، قوستاناي، پاۆلودار، شىمكەنت، ورال، وسكەمەن قالالارى مەن استانا جۇرگىزۋشىلەرى شاقىرىلعان. شەتەلدىك كولىك داۋى ءالى كۇنگە دەيىن ناقتى شەشىم تابا قويمادى. «اكتسيا ۇيىمداستىرۋشىلارى شەتەلدىك ءنومىرى بار اۆتوكولىك يەلەرىن ءار وبلىستىڭ اكىمدىك عيماراتىنىڭ الدىندا جينالۋعا ۇندەدى».

بۇعان دەيىن جىل باسىندا قازاقستان بيلىگى ارمەنيا، قىرعىزستان جانە رەسەيدەن اكەلىنگەن اۆتوكولىكتەردى پايدالانۋدى شەكتەۋ تۋرالى شەشىم شىعارعان ەدى. ءدال وسى باستاما اۆتوكولىك جۇرگىزۋشىلەرىنىڭ نارازىلىعىنا سەبەپ بولدى. ولار مۇنى باعاسى قالتا كوتەرمەيتىن سۋ جاڭا كولىك ساتاتىن اۆتوسالوندارى بار قازاقستاندىق وليگارحتاردىڭ مۇددەسىن عانا كوزدەيدى دەپ سانايدى.

"الەۋمەتتىك جەلىدە تاراعان" حابارلاما. فوتو: "ورال اپتالىعى" باسىلىمى

جىل باستالعالى بەرى ەلدىڭ 10 شاقتى قالاسىندا نارازىلىق وتكىزگەن شەتەلدىك كولىك يەلەرى «تىركەۋدىڭ قالتاعا سالماق تۇسىرەتىنىن»، ءتىپتى «تىركەۋ سوماسى كولىك باعاسىنان اسىپ تۇسەتىنىن» ايتىپ شاعىنادى. ازاماتتار تىركەۋ ءراسىمىن جەڭىلدەتىپ، وزدەرىن كىنالى دەپ تانۋدى توقتاتۋدى سۇرادى.

ءىىم مالىمەتى بويىنشا، كولىكتى ەسەپكە قويۋ 500 مىڭنان 4 ملن تەڭگەگە دەيىن شىعىندالۋ قاجەت. كەشە ماڭعىستاۋدا وتكەن اۆتوكولىك جۇرگىزۋشىلەرىنىڭ كەزەكتى ءبىر شەرۋىندە جينالعاندار:

– ءبىز سالىق تولەۋگە دايىنبىز، بىراق تىركەۋ قىمبات. ەل پرەزيدەنتى توقاەۆتىڭ اۆتوكولىكتەردى 2021 جىلدىڭ ناۋرىزىنا دەيىن ۋاقىتشا تىركەۋ تۋرالى مالىمدەمەسى ءبىزدىڭ پروبلەمانى شەشپەيدى. نەگە مەملەكەت باسشىسى حالىققا قارسى كەلەدى؟ بىزدە كوپ اقشا جوق! ويتكەنى سەرىك جۇمانعارين (ەۋرازيالىق ەكونوميكالىق وداقتىڭ باسەكەلەستىك بويىنشا بلوگ القاسىنىڭ مۇشەسى – رەد.) ارمەنيا ەۋرازيالىق وداققا مۇشە دەدى. سوندىقتان ءبىز سول جەردەن كولىك اكەلە باستادىق، – دەدى.

27 قاڭتار ورال قالاسىنىڭ جۇرگىزۋشىلەرى جينالىپ، بيلىك وكىلدەرىنە 6 مارتە ميتينگ ءۇشىن بەرگەن قتىنىمدى كەرى قايتارعانىن ايتتى. سونداي-اق ولار 30, 31 قاڭتار جانە 1, 2 اقپان كۇندەرى بەيبىت جيىن وتكىزۋگە تاعى دا 4 ءوتىنىش جاسادى.

قاڭتاردىڭ 24-ءى ۇكىمەتتىڭ كەڭەيتىلگەن وتىرىسىندا پرەزيدەنت توقاەۆ حالىق اراسىندا ۋشىعا باستاعان شەتەلدىك ءنومىرى بار كولىكتەردىڭ ماسەلەسىن شەشۋ ءۇشىن ولاردى 2021 جىلدىڭ 1 ناۋرىزىنا دەيىن ۋاقىتشا تىركەۋدى تاپسىردى. دەسە دە 2021 جىلدىڭ 1 ناۋرىزىنا دەيىن كەدەندىك باج سالىعى مەن ۋتيليزاتسيا الىمىن تولەپ، كولىكتى تۇراقتى تىركەۋگە قويۋدى تاپسىردى. ەشقانداي جەڭىلدىك بەرىلگەن جوق.

ەل ىشىندە الەۋمەتتىك (ەڭبەك داۋى، ااك الۋشىلار مەن مۇگەدەك بالا تاربيەلەپ وتىرعان انالار), ساياسي (ازاماتتىق قوعام مەن وپپوزيتسيا), نارازىلىق ۇدەپ تۇرعان تۇستا بيلىك مىڭداعان كولىك يەسىنە شىعىن جاعىنان قولداۋ تانىتپادى.

"The Qazaq Times"