كورنەكى كوللاج. فوتو: QT

ۇلتتىق بانك بۇگىن مونەتا ۇلگىسىندەگى 200 تەڭگەنى اينالىمعا شىعاردى.

ۆەدومستۆو «مونەتانىڭ ديزاينى قازاقستان رەسپۋبليكاسى پرەزيدەنتىنىڭ 2018 جىلعى 12 جەلتوقسانداعى №804 جارلىعىمەن بەكىتىلگەن ۇلتتىق ۆاليۋتا – قازاقستان تەڭگەسى بانكنوتتارى مەن مونەتالارى ديزاينىنىڭ تۇجىرىمداماسىنا سايكەس ورىندالدى. بيكولورلى اينالىستاعى مونەتالار ديزاينىنىڭ ستيليستيكاسىندا شىعىس جانە باتىس مادەنيەتتەرىنىڭ كوركەمدىك ەلەمەنتتەرىنىڭ ۇيلەسىمى كورىنىس بەرەدى»، – دەپ حابارلادى.

تيىننىڭ سىرت جاعىنداعى ورتالىق بولىگىندە مەملەكەتتىك ەلتاڭبا، اينالدىرا ەميتەنت ەلدى بىلدىرەتىن «QAZAQSTAN RESPÝBLIKASY» دەگەن جازبا بەينەلەنگەن. مونەتانىڭ تومەنگى جاعىندا سوعىلعان جىلىن بىلدىرەتىن «2020» دەگەن جازۋ بار. مونەتالاردىڭ بەت جاعىندا (اۆەرسىندە) ورتالىق بولىگىندە نومينالىن بىلدىرەتىن «200» دەپ جازىلعان.

مونەتانىڭ تومەنگى بولىگىندە ۇلتتىق ۆاليۋتانىڭ ماتىندىك اتاۋىن بىلدىرەتىن «TEŃGE» دەگەن جازۋ ورنالاسقان. مونەتانىڭ سول جاق بولىگىندە QAZAQSTAN ULTTYQ BANKI ەميتەنت بانكتى بىلدىرەتىن «QUB» اببرەۆياتۋراسى بار.

جاڭا 200 تەڭگەلىك مونەتا. 28 قاڭتار 2019 جىل. فوتو: ۇلتتىق بانك

تەحنيكالىق سيپاتتامالارى:

مەتالل قۇرامى: نەيزيلبەر/نيبراسس

ماسساسى: 7,5 گرامم

ديامەترى: سىرتقى ساقيناسى – 26 مم، ىشكى ديسكى – 18,3 مم

قالىڭدىعى – 1,90 مم

قىرى: 16 ويىقتار.

ايتا كەتەرلىك جايت، نومينالى 200 (ەكى ءجۇز) تەڭگەلىك قاعاز اقشا (بانكنوتتار) دا زاڭدى تولەم قۇرالى رەتىندە جارامدى بولىپ سانالادى.تەڭگە سارايى مەن قارجى مينيسترلىگىنىڭ اتالعان باستاماسى بىلتىر قازان ايىندا كوتەرىلگەن ەدى. قوعام مۇنى ءارتۇرلى قابىلدادى. تاۋەلسىز ساراپشىلاردىڭ كوبى قاعاز اقشانىڭ مونەتاعا اۋىسۋىن ينفلياتسيانىڭ سالدارىمەن بايلانىستىرسا، تاعى ءبىر بولىگى ۇلتتىق ۆاليۋتانىڭ قۇنسىزداۋىنىڭ كورىنىسى رەتىندە باعالادى.

ال ۇلتتىق بانك توراعاسىنىڭ سول كەزدەگى ورىنباسارى مادينا ابىلقاسىموۆا 200 تەڭگەلىك مونەتا شىعارۋ تۋرالى شەشىمنىڭ سەبەبىن تۇسىندىرگەن بولاتىن.

«ءبىرىنشى كەزەكتە بۇل كۋپيۋرانىڭ ءجيى توزۋىمەن بايلانىستى، ياعني مونەتامەن الماستىرۋعا باعىتتالعان. بۇل – ەڭ كوپ ۇستالاتىن اقشا. 200 تەڭگەلىك اقشا قولما-قول اينالىمدا كوپ جۇرەتىندىكتەن تەز توزادى. قايتا-قايتا قولدانىستان شىعىپ قالاتىن بولعاندىقتان مونەتا ەنگىزۋ تۋرالى شەشىم قابىلداندى»، – دەدى مادينا ابىلقاسىموۆا.

"The Qazaq Times"