استانا احۋالى. 27 قاڭتار 2020 جىل. فوتو: Vلاست / شىڭعىس باقىشەۆ

قازاقستان استاناسىندا كۇن رايى بۇزىلۋىنىڭ كەسىرىنەن توتەنشە جاعداي جاريالاندى.  ىشكى ىستەر ءمينيسترىنىڭ ورىنباسارى يۋري يلين:

«ەلوردا بويىنشا توتەنشە جاعداي جاريالاندى. ول ادىلەت باسقارماسىندا تىركەۋدەن ءوتتى. قازىرگى ۋاقىتتا قالعان 6 اۋدان بويىنشا توتەنشە جاعداي بويىنشا كوميسسيا جينالىسى وتەيىن دەپ جاتىر. توتەنشە جاعداي جاريالاۋدىڭ سەبەبى – ادامداردى مەديتسينالىق قىزمەتتەرمەن، ازىق-تۇلىكپەن قامتاماسىز ەتۋدىڭ، جۇمىسقا، ۇيگە جەتۋدىڭ قيىنداپ كەتۋى»، –  دەپ حابارلادى.

27 قاڭتاردا جەلدىڭ جىلدامدىعى سەكۋندىنا 26 مەترگە جەتكەن. بۇگىن التى ايماق بويىنشا توتەنشە جاعدايلار جونىندەگى كوميسسيانىڭ وتىرىسى وتەدى.

«6 ايماقتاعى شتاب 24 ساعات بويى جۇمىس ىستەپ تۇر. رەسپۋبليكا بويىنشا 96 جول ۋچاسكەسى جابىق. ولاردىڭ 61-ءى استانا مەن اقمولا، شىعىس قازاقستان، اقتوبە، قاراعاندى، باتىس قازاقستان، پاۆلودار، قىزىلوردا، سولتۇستىك قازاقستان وبلىستارىنداعى رەسپۋبليكالىق دارەجەدەگى جولدار. سونىمەن بىرگە وبلىستىق دارەجەدەگى 34 جول جابىلدى. اسىرەسە، كەشە تۇندە جاعداي قيىن بولدى. جەلدىڭ جىلدامدىعى 28 مەتر سەكۋندقا جەتىپ، اۆتوكولىكتەر تۇرىپ قالدى»، – دەدى ۆەدومستۆو ۆيتسە-ءمينيسترى.

سونداي-اق استانا اۋەجايىنىڭ ءباسپاسوز حاتشىسى جەڭىس احمەتجانوۆ «قاۋىپسىزدىك ماقساتىندا بارلىق رەيستەر بەلگىسىز ۋاقىتقا شەگەرىلگەنىن» حابارلادى. جانە قالاداعى مەكتەپتەر مەن كوللەدجدەردە وقۋ پروتسەسى ۋاقىتشا توقتادى.

ال «قازگيدرومەتتىڭ» قىسقا مەرزىمدى بولجامدار باسقارماسىنىڭ باسشىسى الۋا ساحانوۆا:

«29-30 قاڭتاردا سولتۇستىك-باتىس انتيتسيكلونى كەلەدى دەپ بولجادىق. وسىنىڭ سالدارىنان كۇن سۋىتىپ، قاردىڭ ءتۇسۋى توقتايدى. اۋا تەمپەراتۋراسى قاڭتار ايىنداعى قالىپتى دەڭگەيدە بولادى، تۇندە سولتۇستىكتە، شىعىستا جانە ورتالىقتا مينۋس 20-30 گرادۋسقا دەيىن تومەندەيدى», – دەدى.

"The Qazaq Times"