«بيلىك تۇتاس اۋىسسىن»: ورالدا ءبىر كۇندە قاتارىنان ەكى پيكەت ءوتتى

كەشە، 16 قاڭتار ورال قالاسىنىڭ تۇرعىندارى نازگۇل الەنوۆا مەن ەرىك جۇماباەۆ جەكە-جەكە پيكەت وتكىزدى. ەكەۋىنىڭ تالابى فورما تۇرعىسىنان ەكى باسقا بولعانىمەن، كوتەرگەن نەگىزگى ماسەلەسى «بيلىكتىڭ ازاماتتىق قوعام ۇنىنە دەر كەزىندە قۇلاق اسۋى». ايتپاقشى، پرەزيدەنت توقاەۆ ءۇش پرينتسيپتەن تۇراتىن «حالىق ۇنىنە قۇلاق اساتىن مەلەكەت» تۇجىرىمداماسىن ايتىپ جۇرگەنىنە بىرنەشە اي بولدى.

ءوڭىر تۇرعىنى نازگۇل الەنوۆا قالا ورتالىعىنداعى مانشۇك مامەتوۆا الاڭىنا بارىپ، قولىنا «تۇتاس بيلىكتىڭ اۋىسقانىن قالايمىن» دەگەن جازۋى بار پلاكات ۇستاپ شىقتى. ازاتتىقتىڭ ايتۋىنشا، جۇيەنىڭ جاڭارۋىن قالايتىن ازامات ءوز پىكىرىن اشىق ايتۋعا حاقى بار ەكەنىن جەتكىزگەن.

نازگۇل الەنوۆا «مەن تۇتاس بيلىكتىڭ اۋىسقانىن قالايمىن، سەبەبى بارلىق مەملەكەتتىك ورگاندار، مەكەمەلەر، سۋديالار، دەپۋتاتتار بيلىكتى زاڭسىز باسىپ العان. توقاەۆ تا سول. ەشكىم توقاەۆتى سايلاعان جوق. قازىر بارلىق زاڭدار قاراپايىم حالىقتىڭ مۇددەسىنە قاراما-قايشى. سوندىقتان توقاەۆتىڭ وتستاۆكاعا كەتكەنىن قالايمىن. ول وتستاۆكاعا كەتسىن دەپ تالاپ ەتەمىن»،– دەگەن.

كوپ وتپەي بەلسەندىنىڭ جانىنا ءبىر ەر ادام كەلىپ، ءوزىن ىشكى ساياسات ءبولىمىنىڭ قىزمەتكەرىمىن دەپ تانىستىرعان. شەنەۋنىك اتالعان اكتسيانىڭ «زاڭسىز ەكەنىن، ونى بيلىكتىڭ رۇقساتىنسىز وتكىزىپ جاتقانىن» العا تارتىپتى. بىراق بەلسەندى كونستيتۋتسيانى جاقسى بىلەتىنىن جانە زاڭ اياسىندا ارەكەت ەتىپ جاتقانىن ايتتى. سونداي-اق الەنوۆانىڭ سوزىنشە، ول ەشبىر پارتيا نەمەسە ۇيىمعا مۇشە ەمەس، جاي عانا ازماتتىق قوعام وكىلى. جارتى ساعاتقا جۋىق ۋاقىتقا سوزىلعان اكتسيادا بەلسەندى ۇزاق جىلدار بويى مەملەكەتتىك قىزمەتتە بولعانىن، سوڭعى جىلدارى جۇمىستان بوساپ، ازاماتتاردىڭ قۇقىعىنىڭ بۇزىلۋىنا بەيجاي قاراي المايتىنىن جەتكىزدى.

ءدال وسى كۇنى ازاماتتىق بەلسەندى ەرىك جۇماباەۆ تا قولىنا «ماعان قدت («قازاقستاننىڭ دەموكراتيالىق تاڭداۋى») باعدارلاماسى ۇنايدى» دەگەن ءسوز جازىلعان پلاكات ۇستاپ الاڭعا كەلگەن. ونىڭ شىعىپ جۇرگەن بىرنەشە كۇن بولعان. دەگەنمەن بەلسەندىنىڭ ايتۋىنشا، ونىڭ اتالعان ۇيىمعا ەش قاتىسى جوق، وعان مۇشە ەمەس.

سوڭعى جىلدارى ەلدە كوپشىلىك ميتينگ پەن پيكەتتەر كوبەيگەن. توقاەۆ پرەزيدەنت بولعالى بەرى ازاماتتاردىڭ ەركىن پىكىر بىلدىرۋگە قۇقىعى بار دەگەنىمەن، شەرۋ-پيكەتكە شىققان بەلسەندىلەر قۋعىنعا ۇشىراۋى توقتار ەمەس.

"The Qazaq Times"