سوت اتاجۇرتىنان پانا ىزدەپ كەلگەن تىلەك تابارىكۇلىن ەلدە قالدىردى

;feature=emb_title">ازاتتىقتىڭ سوت زالىنان تاراتقان حابارىنا قاراعاندا، تابارىكۇلىنىڭ تۋىستارى مەن بەلسەندىلەر قاتىسقان سوت پروتسەسىن سۋديا دينارا قۇيقاباەۆا قارادى. تابارىكۇلى 2018 جىلى مامىر ايىندا قورعاس ساۋدا ورتالىعىندا وڭتايلى تۇستى پايدالانىپ قازاقستان-قىتاي شەكاراسىن زاڭسىز كەسىپ وتكەن.

سوت وتىرىسى بارىسىندا ادۆوكات ابدۋللا باقبەرگەن ەتنيكالىق قازاقتىڭ ىقتيارحاتىنىڭ كوشىرمەسى مەن ازاماتتىق الۋعا جازعان ءوتىنىشى، تاعى بىرنەشە قۇجاتتى ءىس ماتەريالدارىنا قوسۋدى سۇرادى. سۋديا ءوتىنىشتى قاناعاتتاندىردى.

پروكۋرور ازامات بايساروۆ ايىپتاۋ اكتىسىندە «شەكارانى ادەيى كەسىپ ءوتۋىنىڭ ماقساتى – قازاقستان ازاماتتىعىن الۋ بولعان، ويتكەنى بۇرىن وندا قازاقستاننىڭ ىقتيارحاتى بولعان» دەدى. 2017 جىلى جەلتوقساندا قىتايعا وتكەن كەزدە جەرگىلىكتى مەكەمە قۇجاتىن الىپ، قايتارماي قويعان. وسىلايشا 2018 جىلى كوكتەمدە 30 يۋان اقشاعا رۇقسات قاعازىن ساتىپ الىپ، قورعاس ساۋدا ايماعىنان زاڭسىز، ەشبىر تىركەۋسىز جاسىرىن قازاقستانعا ءوتىپ كەتكەن. سانالى تۇردە تاۋەكەل ەتىپ تاريحي وتانىنا قاشقان ايىپتالۋشى ءوز قاتەسىن مويىنداعان ءارى قانداي جازا بولسا دا قىتايعا قايتارماۋىن سۇراپ، ونى ەلدە وتەۋگە دايىن ەكەنىن جەتكىزگەن.

دەڭگەيى «ونشا اۋىر ەمەس قىلمىس» بولعاندىقتان، بۇرىن ەشقاشان ءىستى بولماعانىن جانە ءوزىنىڭ قاتەسىن شىن جۇرەكتەن مويىنداۋىن، مۇنداي قادامعا وتباسىمەن قوسىلۋ ماقساتىندا بارعانىن ەسكەرە وتىرىپ ۇكىم كەستى. سۋديا قىلمىستىق كودەكستىڭ 392 بابى بويىنشا 6 ايعا باس بوستاندىعىنان ايىرىپ، جازاسىن قاۋىپسىزدىگى بارىنشا تومەن كولونيادا وتەۋ تۋرالى ۇكىم شىعاردى.

22 قازاننان باستاپ تەرگەۋ يزولياتورىندا بولعانىن ەسەپكە العاندا، ول 5 اي 18 كۇنىن وتەگەن بولىپ شىعادى.سونداي-اق 30 جاستاعى تىلەك تابارىكۇلىن جابىرلەنۋشىلەر قورىنا 10اەك (25 250 تەڭگە) كولەمىندە ايىپپۇل وتەۋگە مىندەتتەدى.

2018 جىلى تامىزدا ەتنيكالىق قازاق سايراگۇل ساۋىتبايدىڭ سوتى ءوتىپ، ەلدە قالعانىمەن بوسقىن مارتەبەسىن الا الماي، شۆەتسياعا قونىس اۋدارعان بولاتىن.

ال بىلتىر 23 جەلتوقساندا جاركەنت سوتى قىتاي قۋعىن-قىسىمىنان قاشىپ كەلگەن قايشا اقاندى التى ايعا شارتتى جازاعا كەسكەن ەدى. بۇعان دەيىن  شىڭجاڭ قازاقتارى قاستەر مۇساحانۇلى مەن مۇراگەر ءالىمۇلى كۇزدە ازشىلىق ۇلتتارعا جالىنىن بۇركىگەن اجداھادان باس ساۋعا ىزدەپ، شەكارا كەسىپ وتكەن. ولاردىڭ سوتى 6 قاڭتاردى باستالدى.

“The Qazaq Times”