كورنەكى سۋرەت. فوتو: اشىق دەرەككوز

بيۋدجەتتەن 11,4 ملن تەڭگە جىمقىرعان اكىمدىك قىزمەتكەرى سوتتالدى.

كەشە ورال قالاسىنا قارايتىن جەلاەۆ اۋىلدىق وكرۋگى اكىمى اپپاراتىنىڭ قارجى-ەكونوميكا ءبولىمىنىڭ باسشىسى گۇلسارا حابۋلوۆاعا بيۋدجەت قارجىسىن جىمقىردى دەگەن ايىپپەن سوت ۇكىم شىعاردى.

بقو بويىنشا ەكونوميكالىق تەرگەۋ دەپارتامەنتىنەن تۇسكەن مالىمەتكە قاراعاندا، گ.حابۋلوۆا 2013-2019 جىلدارى بۋحگالتەرلىك قۇجاتقا اتالعان مەملەكەتتىك مەكەمەنىڭ شارۋاشىلىق جانە قارجىلىق قىزمەتى تۋرالى كورىنەۋ جالعان مالىمەتتەر ەنگىزىپ كەلگەن.

اتاپ ايتقاندا، «كازناچەيستۆو كليەنت» اقپاراتتىق جۇيەسىندە ءوزىنىڭ ەلەكتروندى قولتاڭباسىن پايدالانا وتىرىپ، كارتوچكالىق شوتىنا ەڭبەك دەمالىسى جانە ەمدىك جاردەماقى تۇرىندەگى قاراجاتتى نەگىزسىز اۋدارعان. ءسويتىپ ول مەملەكەتكە 11 ملن 473,149 مىڭ تەڭگە زالال كەلتىرگەن. «قازىرگى تاڭدا شىعىن تولىق وتەلدى» دەلىنگەن ۆەدومستۆو حابارلاماسىندا.

14 جىل بويى ەسەپشى قىزمەتىندە بولعان حابۋلوۆا ورال قالالىق سوتىنىڭ ۇكىمىمەن  قىلمىستىق كودەكستىڭ 189-بابى «باسقانىڭ سەنiپ تاپسىرعان مۇلiكىن يەمدەنۋ نەمەسە تالان-تاراجعا سالۋ» بويىنشا ايىپتى دەپ تانىلىپ، ەكى جىلعا سوتتالدى.

“The Qazaq Times”