تەھراندا بىرنەشە ۋنيۆەرسيتەتتىڭ ستۋدەنتتەرى ەرەۋىلگە قاتىستى. فوتو: VOA7

يرانداعى ۇكىمەتكە قارسى نارازىلىق ەرەۋىلدەرى كەشە ءۇشىنشى كۇنگە جالعاسقان بولاتىن. ەلدەگى بەدەلدى ۋنيۆەرسيتەتتەردىڭ ستۋدەنتتەرى نارازىلىق كەزىندە ەلدىڭ يسلام رەجيمىن اشىق ايىپتادى. نارازى جۇرت قازىرگى رۋحاني كوسەمدەرى اياتوللا حومەنەيدىڭ بيلىكتەن كەتۋىن تالاپ ەتۋدە. 

بۇل نارازىلىق شاراسى يران اسكەريلەرىنىڭ ۋكرايناعا تيەسىلى ۇشاقتى كەزدەيسوق اتىپ العانىن مويىنداعاننان كەيىن باستالدى. باستابىندا يران ۇكىمەتى ۇشاقتىڭ قۇلاۋىنا تەحنيكالىق اقاۋ سەبەپ بولدى دەپ كەلگەن ەدى. 3 كۇننەن كەيىن يران اسكەريلەرى 176 جولاۋشى وتىرعان ۇشاقتى ابايسىزدا اتىپ قۇلاتقاندارىن مويىندادى. ۋكراينانىڭ جولاۋشىلار ۇشاعى اۋەگە كوتەرىلۋدەن ءسال عانا بۇرىن يران قارۋلى كۇشتەرى يراكتاعى اقش بازاسىنا زىمىران شابۋىلىن جاساپ بولىپ، ەندى بولۋى مۇمكىن اقش-تىڭ قايتارما سوققىسىنا دايىندالىپ وتىرعان. دەمىن ىشىنە تارتقان وسىنداي ساتتە، تەھران كەڭىستىگىندە پايدا بولعان شەتەلدىك ۇشاق وققا ىلىنگەن. يران اسكەريلەرىنىڭ تۇسىندىرۋىنشە وسىلاي. بۇل قاتەلىك ەلدەگى ونسىزدا ۇكىمەتكە دەگەن بۋلىققان اشۋ-ىزانى ءورشىتىپ جىبەردى.

"سونداعى ترامپتىڭ ايتقان ءسوزى".

يران ازاماتتارىنىڭ ەرەۋىلدەرىنە باتىس ەلدەرى، اسىرەسە اقش باسا نازار اۋدارىپ وتىر. جەكسەنبىدە اقش پرەزيدەنت دونالد ترامپ "تۆيتتەردە" پارسى تىلىندە مالىمدەمە جاساپ، يرانداعى ەرەۋىلشىلەرگە قولداۋ كورسەتتى، ءارى نارازىلىق شاراسىن قالت جىبەرمەي باقىلاپ وتىرعاندارىن ايتتى. دۇيسەنبىدە، اقش مەملەكەتتىك حاتشىسى پومپەو دا يرانداعى ەرەۋىلشىلەردىڭ باتىلدىعىن جوعارى باعالادى جانە ەرەۋىلگە قاتىسقاندار سانىنىڭ تاڭقالارلىق دەڭگەيدە ەكەنىن ايتتى.

VOA-دىڭ جاڭالىقتار قىزمەتى تەھران قالاسىندا قاۋىپسىزدىك كۇشتەرىنىڭ كوپتەپ توپتاستىرىلعانىن حابارلادى.

“The Qazaq Times”