"سەرگەك" بەينەباقىلاۋ جۇيەسى ۇلعايتىلدى: تۇزاق، الدە ءتارتىپ..؟

الماتى قالاسىنىڭ پوليتسيا دەپارتامەنتى ءباسپاسوز قىزمەتىنىڭ حابارلاۋىنشا، بيىل قاڭتاردان باستاپ كوشە بويىندا «سەرگەك» بەينە باقىلاۋ جۇيەسى جەتىلدىرىلىپ، قوسىمشا جۇزدەگەن كامەرا ورناتىلادى. ناقتىراق ايتقاندا، 1 قاڭتار جاڭا 400 كامەرا ىسكە قوسىلدى.

كامەرالار رۇقساتتى جىلدامدىقتى ارتتىرۋ، قىزىلعا ءوتۋ، جول بەلگىلەرى مەن جولاقتارىنىڭ تالاپتارىن بۇزۋ، رۇقسات ەتىلمەگەن جەردە توقتاۋ مەن تۇرۋ جانە اۆتوبۋس جولاعىمەن ءجۇرۋ سياقتى ەرەجە بۇزۋشىلىقتاردى تىركەپ، كولىك يەسىنە ايىپپۇل جازىپ بەرە الادى.

جول ەرەجەسىن بۇزۋ دەرەكتەرى 2020 جىلدىڭ 1 قاڭتارىنان باستاپ تىركەلە باستايدى. 100 بۇرىلىسقا ارقايسىسى 4 كامەرادان تۇراتىن باقىلاۋ كومپلەكسى قويىلعان. ءبىر استانانىڭ وزىندە 2018 جىلى العاشقى ون ايدا مەملەكەتتىك بيۋدجەتكە جالپى سوماسى 1 ميلليارد 270 ميلليون تەڭگە، ال 2019 جىلدىڭ ون ايىندا 5 ميلليارد تەڭگە كولەمىندە قارجى تۇسكەن.

قۇزىرلى ورگان وكىلدەرى «سەرگەكتىڭ» ارقاسىندا جول اپاتى سيرەپ، زارداپ شەگۋشىلەردىڭ ايتارلىقتاي ازايعانىن ايتادى. ال كوپشىلىك مۇنى «زاڭدى توناۋشىلىق» دەپ سانايدى. http://sergek.kz/ سايتىندا اقپارات تەك ورىس تىلىندە بەرىلگەن. الماتى قالاسىندا ورناتىلعان «سەرگەك» كامەرالارى گەولوكاتسياسىن مىنا كارتادان كورە الاسىز:

الماتىداعى "سەرگەك" كامەراسىنىڭ گەولوكاتسيا كارتاسى. 6 قاڭتار 2020 جىل. فوتو: Yandex map سايتىنان سكرينشوت-قيىندى

اتالعان باقىلاۋ جۇيەسى 2017 جىلى استانا قالاسىنىڭ ينۆەستيتسيالار جانە دامۋ باسقارماسى مەن «استانا Innovations» اق جانە «كوركەم تەلەكوم» جشس-ءنىڭ اراسىندا مەملەكەتتىك-جەكەمەنشىك ارىپتەستىك جوبا رەتىندە جۇزەگە اسىرىلعان. اشىق دەرەككوزدەگى ەسەپ.كز (uchet.kz) كونتراگەنتتەردى تەكسەرۋ سەرۆيسىندە جوباعا جاۋاپتى كومپانيا، اسەت احمەتوۆ باسشىلىق ەتەتىن «كوركەم-تەلەكوم» جشس-ءى 2018 جىلى 72,7 ميلليون تەڭگە سالىق تولەگەن. ال ارىستان قازجانوۆ يەلىگىندەگى «استانا Innovations» اق جوبا باستالعان جىلى، ياعني 2017 جىلى جالپى جيىنى 232 ميلليون، 2018 جىلى 138,9 ميلليون تەڭگە سالىق تولەگەن.

"The Qazaq Times"