قاڭتاردان باستاپ زاڭ قاتاڭ: الكاگول نەمەسە اق جول

بيىل قاڭتاردان باستاپ ماس كۇيىندە كولىك جۇرگىزىپ، جول قوزعالىسى ەرەجەسىن بۇزعاندار تۇرمەدەن ءبىر-اق شىعۋى مۇمكىن.  

باس پروكۋروردىڭ ورىنباسارى مارات احمەتجانوۆ:

– قوعامدا قىزۋ پىكىرتالاس تۋدىراتىن وزەكتى ماسەلەلەردىڭ ءبىرى – ماس كۇيىندە كولىك جۇرگىزۋ تۋرالى. پرەزيدەنت بۇل ماسەلەدە جاۋاپكەرشىلىكتى كۇشەيتۋدى تاپسىرعان. ول زاڭ بۇزۋشىلاردى تۇرمەگە وتىرعىزىپ، ايىپپۇل سالىپ، كولىك جۇرگىزۋ قۇقىعىنان ءومىر بويىنا ايىرۋ كەرەك دەدى. وكىنىشكە وراي، جىل سايىن ماس كۇيىندە كولىك جۇرگىزگەن 30 مىڭنان استام جاعداي تىركەلەدى. ماس جۇرگىزۋشىلەردىڭ كەسىرىنەن بولعان اپاتتان 2019 جىلدىڭ وزىندە 1000-نان استام ازامات جاراقات الدى نەمەسە قايتىس بولدى، – دەدى ورتالىق كوممۋنيكاتسيالار قىزمەتىندە وتكەن بريفينگتە.

الداعى ۋاقىتتا جول ەرەجەسىن بۇزعان اۆتوكولىك يەسى (الكوگولدىك ماساڭدىق نەمەسە ماس) وقيعا كەزىندە قانداي دەڭگەيدە ماس بولعانىنا قاراماستان، زاڭدا ەشقانداي ايىرما ءمانى جوق. ەندىگى زاڭ بويىنشا كىسى قاققان جۇرگىزۋشىنىڭ قانىنان الكوگول تابىلسا، وندا ول بىردەن اۋىر قىلمىس ساناتىنا جاتقىزىلادى، تاتۋلاسۋعا مۇمكىندىك بەرىلمەيدى. ماس كۇيىندە جاسالعان وسىنداي قىلمىسقا 10 جىلعا دەيىن باس بوستاندىعىنان، قالا بەردى ءومىر بويى كولىك ايداۋ قۇقىعىنان ايىرىلادى (قك 345-1 بابى). ال ماس كۇيدە كولىك ايداعانى ءۇشىن 30 تاۋلىككە دەيىن اكىمشىلىك قاماۋ مەرزىمى ۇزارتىلىپ، جۇرگىزۋ قۇقىعىنان ايىرۋ دەدلاينى 8 جىلعا دەيىن ۇلعايماق. بۇل بىلتىر قاراشادا پارلامەنتتە قارالىپ، ماقۇلدانعان «قر-نىڭ كەيبىر زاڭنامالىق اكتىلەرىنە قىلمىستىق جانە قىلمىستىق پروتسەستىك زاڭنامانى جەتىلدىرۋ ماسەلەلەرى بويىنشا وزگەرتۋلەر مەن تولىقتىرۋلار ەنگىزۋ تۋرالى»  زاڭ جوباسى اياسىندا كۇشىنە ەنگەن نورمالار.

سونداي-اق ۆەدومستۆو وكىلى:

– ەگەر ازامات بەلگىلى ءبىر مەرزىمگە جۇرگىزۋشى كۋالىگىنەن ايىرىلىپ، كەيىن ونى العان سوڭ قايتادان ۇستالىپ، كولىكتىڭ رولىنە ماس كۇيىندە وتىرعانى بەلگىلى بولسا، وندا كولىك جۇرگىزۋ قۇقىعىنان ءومىر بويىنا ايىرىلادى، – دەپ ناقتىلادى.

"The Qazaq Times"