اقش پرەزيدەنت تاعىنا ترامپ كەلگەلى بەرى جوعارى قورعانىس شىعىندارىن العا تارتا وتىرىپ، قۇراما شتاتتاردىڭ شەتەلدەگى اسكەري كۇشتەرىن قىسقارتىپ كەلدى. وسىعان وراي اقش-تىڭ اۋعانستانداعى، يراكتاعى جانە ءسۇريا جەرىندەگى اسكەري كۇشتەرىنىڭ سانىندا وزگەرىستەر بولدى. جاقىندا اقش قورعانىس ءمينيسترى باتىس افريكاداعى بىرقاتار ەلدەردەگى اسكەرلەردىڭ سانىن ازايتۋدى، ءتىپتى كەيبىر ەلدەردەن اقش اسكەرىن تولىقتاي شىعارىپ كەتۋدى جوسپارلاپ وتىرعانى ءمالىم بولدى.

بۇنداي مالىمدەمەنى The New York Times باسىلىمى پەنتاگوننىڭ جوعارى لاۋازىمدى وكىلىنە سىلتەمە جاساي وتىرىپ تاراتتى. وندا اقش-تىڭ كەيبىر ايماقتاعى اسكەري كۇشتەرى باسقا ەلدەر مەن ايماقتارعا ورنالاستىرۋ تۋرالى جوسپارلاردىڭ بار ەكەنى دە ايتىلعان.

مالىمەتتەرگە قاراعاندا اقش يراكتاعى اسكەر سانىن قازىرگى 5 مىڭنان، 2500 ادامعا دەيىن ازايتپاق. سونداي-اق، قورعانىس ءمينيسترى ەسپەر افريكاداعى اقش قارۋلى كۇشتەرىنىڭ باس قولباسشىلىعىنا اسكەر سانىن قىسقارتۋ جانە كەيبىر ەلدەردەن اسكەري شەگىنىس جاساۋدىڭ ناقتى جوسپارىن قاڭتار ايىنا دەيىن دايىنداماق.

اتالعان باسىلىمنىڭ حابارىندا اقش نيگەريادان اۋقىمدى اسكەري شەگىنىس جاسايتىنى ايتىلعان. ايتالىق، نيگەرياداعى ۇشقىشسىز ۇشۋ قۇرىلعىلارىنىڭ بازاسىنان شەگىنىپ شىعادى. قۇنى 110 ملن اقش دوللارى تۇراتىن بۇل بازانى اقش-تىڭ ناتو-داعى بىرقاتار وداقتاستارى دا پايدالانىپ كەلگەن ەدى.

امەريكا قۇراما شتاتتارىنىڭ شەتەلدەردە 200 مىڭنان استام اسكەري كۇشتەرى قىزمەت اتقارادى. ۋاشينگتوننىڭ شەتەلدەگى اسەرلەرىن قىسقارتۋىن كەيبىر ساراپشىلار ستراتەگيالىق قاتەلىك رەتىندە دە باعالاپ وتىر. ايتالىق، اقش-تىڭ شەتەلدەگى اسكەرلەرىن قىسقارتۋى ەۋروپاعا جاقىن ايماقتاردىڭ تۇراقسىزدىعىنا الىپ كەلەدى جانە بۇل ەۋروپانى جاڭا قاۋىپكە دۋشار ەتپەك. سونداي-اق، اقش اسكەري شەگىنىس جاساعان ايماقتاردا رەسەي مەن قىتايدىڭ اسكەري ىقپالى ارتا ءتۇسۋى مۇمكنى دەگەن بولجامدار جاسايدى.

“The Qazaq Times”