كورنەكى سۋرەت. فوتو: «قازاتومونەركاسىپ» ۇاك اق كەڭسەسى

تابيعي ۋراننىڭ ءىرى ءوندىرۋشىسى «قازاتومونەركاسىپ» ۇلتتىق اتوم كومپانياسى» اق اكىمشىلىك جاۋاپكەرشىلىككە تارتىلدى.

قر ەنەرگەتيكا مينيسترلىگىنىڭ ءباسپاسوز قىزمەتى تاراتقان حابار بويىنشا,  تەكسەرىس ناتيجەسىندە انىقتالعان قۇقىق بۇزۋشىلىقتى جويۋ تۋرالى ۇيعارىم جاسالعان. سايكەسىنشە، قۇزىرلى ورگاندار «قازاتومونەركاسىپ» ۇاك» اق-نىڭ ۇستىنەن اكىمشىلىك قۇقىق بۇزۋشىلىق جونىندە ءىس قوزعاپ، اكىمشىلىك جازا تاعايىنداعان.

«قر ەنەرگەتيكا مينيسترلىگىنىڭ اتومدىق جانە ەنەرگەتيكالىق قاداعالاۋ مەن باقىلاۋ كوميتەتى ۋران ەكسپورتى مەن يمپورتى بويىنشا قازاقستان رەسپۋبليكاسىنىڭ ۇلتتىق وپەراتورى مارتەبەسىنە يە «قازاتومونەركاسىپ» ۇاك» اق-عا قاتىستى اتوم ەنەرگياسىن پايدالانۋ سالاسىنداعى نورماتيۆتىك-قۇقىقتىق اكتىلەردىڭ تالاپتارىنا سايكەستىگىنە تەكسەرۋ جۇرگىزدى. تەكسەرۋ بارىسىندا تابيعي ۋراندى جونەلتۋ، پەرسونالدى وقىتۋ جانە فيزيكالىق قورعاۋ جوسپارىنىڭ بولۋى كەزىندە ۋاكىلەتتى ورگاندى ۋاقتىلى حاباردار ەتپەۋ بولىگىندە اتوم ەنەرگياسىن پايدالانۋ سالاسىنداعى نورماتيۆتىك-قۇقىقتىق اكتىلەر تالاپتارىنىڭ بۇزىلۋى انىقتالدى»، – دەلىنگەن ۆەدومستۆو حابارلاماسىندا.

اسىلىندە «قازاتومونەركاسىپ» ۇاك» اق – ۋران، سيرەك مەتالدار، اتوم ەلەكتر ستانتسيالارىنا ارنالعان يادرولىق وتىن يمپورتى مەن ەكسپورتى بويىنشا قازاقستان رەسپۋبليكاسىنىڭ ۇلتتىق وپەراتورى. 2009 جىلدان بەرى قازاقستان تابيعي ۋران ءوندىرۋ بويىنشا الەمدىك كوشباسشى.

ۇلتتىق اتوم كومپانياسىنىڭ اكتيۆتەرى گەولوگيالىق بارلاۋ، ۋران ءوندىرۋ، يادرولىق وتىن تسيكلىنىڭ ونىمدەرىن وندىرۋدەن باستاپ، عىلىم، الەۋمەتتىك قامتاماسىز ەتۋ جانە مامان دايارلاۋعا دەيىنگى تۇپكى ءونىم ءوندىرۋ تىزبەگىنە قاتىساتىن كاسىپورىندار كەشەنىن قامتيدى. بىراق 21 مىڭ ادامدى قىزمەتپەن قامتىپ وتىرعان كومپانيا ءوندىرىسىنىڭ 100%-ى شەتەلگە ەكسپورتتالادى. الەمدىك ۋران وندىرىسىندەگى كومپانيا ۇلەسى 23%. بىلتىر كومپانياعا ءونىم ساتۋدان جانە قىزمەت كورسەتۋدەن 436 632 ميلليون تەڭگە تابىس تۇسكەن.

"The Qazaq Times"