كورنەكى سۋرەت. فوتو: اشىق دەرەككوز

اتىراۋداعى حالىقارالىق اۋەجايعا حالىق قاھارمانى حيۋاز دوسپانوۆانىڭ اتى بەرىلدى.

ەلەكتروندى ۇكىمەت سايتىندا جاريالانعان قاۋلىدا «اتىراۋ حالىقارالىق اۋەجايى» اكتسيونەرلىك قوعامىنا حيۋاز دوسپانوۆانىڭ ەسىمى بەرىلسىن»، - دەلىنگەن.

حيۋاز دوسپانوۆا – قازاق ۇلتىنان شىققان تۇڭعىش ۇشقىش قىز. ول ەكىنشى دۇنيەجۇزىلىك سوعىسى كەزىندە 588-ءشى تۇنگى بومبالاۋ اۆياپولكىندە قىزمەت ەتىپ، وڭتۇستىك فرونتتا، سولتۇستىك كاۆكازدا، ۋكراينا مەن بەلورۋسيادا ارنايى تاپسىرمالار ورىنداعان. ەكى مارتە اۋىر جارالانعانىنا قاراماستان، سوعىس الاڭىنا ورالىپ، جەڭىستى بەرليندە قارسى العان.

سوعىستان II توپتاعى مۇگەدەك بولىپ كەلىپ، 1959 جىلعا دەيىن ءارتۇرلى پارتيالىق قىزمەتتە بولعان. دەنساۋلىعىنا بايلانىستى قىرىق جاسقا جەتپەي زەينەتكە شىققان.

2004 پرەزيدەنت جارلىعىمەن حالىق قاھارمانى اتاعى بەرىلگەن. ەسىمى مانشۇك-اليامەن قاتار اتالاتىن سوعىس ارداگەرى 2008 جىلى قايتىس بولدى. ونىڭ ەسىمىن اتىراۋ اۋەجايىنا بەرۋ تۋرالى ۇسىنىس سول كەزدەن-اق باستالعان.

سونىمەن قوسا قۇجاتتا بىرقاتار ءبىلىم وشاقتارىنىڭ اتاۋى وزگەرتىلگەن. جالپى ءبىلىم بەرەتىن نارىن ورتا مەكتەبى «فاريزا وڭعارسىنوۆا»، ف.ەنگەلس اتىنداعى جالپى ورتا مەكتەبى «قادىر مىرزا ءالي»، ن.ۆ.گوگول اتىنداعى جالپى ورتا مەكتەبى «عابيت مۇسىرەپوۆتىڭ جانە ن.ك.كرۋپسكايا اتىنداعى جالپى ورتا مەكتەبى دە فاريزا اقىننىڭ اتىنا اۋىستىرىلدى.

"The Qazaq Times"