يران تەلەارناسى ۇكىمەتتىڭ حالىققا وق اتقانىن راستادى

يراننىڭ مەملەكەتتىك تەلەارناسى قاراشاداعى نارازىلىق كەزىندە ۇكىمەتتىڭ حالىققا وق اتقانىن راستادى. الايدا، نارازى توپتى ەلدى بۇلىككە باستاعان «بانديتتەر» جانە «بۇلىكشىلەر» دەپ اتاعان.

ەستەرىڭىزدە بولسا، بۇدان بىرەر اپتا بۇرىن يراندا جانار جاعار مايدىڭ قىمباتتاۋىنا بايلانىستى حالىقتىق نارازىلىق بولعان ەدى. نارازىلىق كەزىندە يراندا عالامتور جەلىسى اپتا بويى بۇعاتتالىپ قالعان بولاتىن. بىرقاتار باتىس ەلدەرى يراندى ەرەۋىلشىلەرگە قارسى وق اتتى جانە وسى ارەكەتىن جاسىرۋ ءۇشىن ينتەرنەتتى بۇعاتتادى دەپ ايىپتاعان.

اقپارات كوزدەرىنىڭ مالىمەتىنە قاراعاندا نارازىلىق كەزىندە قۇقىق قورعاۋ قىزمەتكەرلەرى مەن نارازى توپ اراسىندا قاقتىعىس كەزىندە 208 ادام ولگەنىن ايتادى. كەيبىر اقپارات كوزدەرى بۇل ساندى 400-گە جەتكەنىن ايتادى. ال، ەلدىڭ رەسمي وكىلدەرى بۇل مالىمەتتەردى جالعان دەپ كورسەتتى، الايدا وزدەرى ادام ءولىمى تۋرالى ناقتى سان كورسەتپەدى.

يراننىڭ IRTV2 ارناسىنىڭ حابارىندا «قۇرالدى بانديتتەر» مەن «كوتەرىلىسشىلەر» قۇقىق قورعاۋشىلارعا جانە الەۋمەتتىك نىساندارعا قۇرالدى شابۋىل جاسادى دەگەن. حاباردا ايتۋىنشا «كوتەرىلىسشىلەر» كەرمان پروۆينتسياسىندا مۇناي نىساندارىن جارىپ جىبەرۋدى جوسپارلاعان.

بۇعان دەيىن The New York Times باسىلىمى يسلام رەۆوليۋتسياسى ساقشىلارى بەندەر-ماشاحردا ەرەۋىلشىلەرگە وق اتىپ، كەمىندە 40 نەمەسە 100-گە جۋىق ادام ولگەنىن جازىپ ەدى. بۇل شاھاردا ەرەۋىلشىلەر مۇناي نىسانىن باسىپ الۋدى جوسپارلعان. الايدا، يران تەلەارناسىنىڭ حابارىندا «كوتەرىلىسشىلەر رەسمي سوعىس باستادى» دەپ كورسەتكەن.

“ The Qazaq Times”