«الماتىمەتروقۇرىلىس» كومپانياسى ديرەكتورلار كەڭەسىنىڭ توراعاسى قايرات رەيموۆ كۇدىكتى رەتىندە ۇستالدى.

27 قاراشا كۇنى الماتىدا وتكەن ءباسپاسوز كونفەرەنتسياسىندا ايتىلعان حاباردان سوڭ جۇمىسشىلار جاڭا ستانتسيالار قۇرىلىسىنداعى ماسەلەلەردى باياندادى.

كومپانيا قىزمەكەرلەرى كومپانيا باسشىسىنىڭ ۇستالۋىنا بايلانىستى ينۆەستورلار جوبادان باس تارتادى جانە ەڭبەكاقى تولەۋدە ماسەلەلەر تۋىندايدى دەپ الاڭداۋدا.

قايرات رەيموۆتىڭ ۇستالۋى تۋرالى اقپاراتتى ونىڭ ادۆوكاتى ءالىمجان ورالباي راستاپ وتىر. ونىڭ ايتۋىنشا، رەيموۆ 27 قاراشا تاڭەرتەڭگىلىك الماتى پوليتسيا دەپارتامەنتىنىڭ عيماراتىندا ۇستالعان. ول ىسكە كۇدىكتى رەتىندە تارتىلعان.

رەيموۆتىڭ ادۆوكاتى ءالىمجان ورالباي ونى 27 قاراشادا تاڭەرتەڭ ۇستاعانىن، ونىڭ قازىرگى مارتەبەسى كۇدىكتى ەكەنىن ايتقان.

ادۆوكات ءالىمجان ورالبايدىڭ سوزىنشە، رەيموۆ ەكى-ءۇش كۇندە بوساتىلادى:

– تەرگەۋشى ونى جاۋاپ الۋعا شاقىردى. سول كەزدە ۇستاۋ تۋرالى ايتىلدى. ول قىلمىستىق ءىس جۇرگىزۋ كودەكسىنە سايكەس ۋاقىتشا ۇستاۋ يزولياتورىندا ەكى تاۋلىك بولادى. وسى ۋاقىتتا تەرگەۋشى رەيموۆقا قاتىستى سوتقا بۇلتارتپاۋ شاراسىن تاڭداۋ تۋرالى ءوتىنىش جاساۋى ءتيىس، – دەدى.

كەشە كەشكە «الماتىمەتروقۇرىلىس» كومپانياسىنىڭ جۇزگە جۋىق جۇمىسشىسى «سارىارقا» مەترو بەكەتىندە جينالىپ، رەيموۆتىڭ ۇستالۋىنا قارسىلىق تانىتقان. ولار رەيموۆتىڭ كۇردەلى ماسەلەلەردى شەشۋدە ماڭىزدى ءرول اتقارعانىن ايتىپ، ونىڭ ۇستالۋى مەترونىڭ ەكى بەكەتى قۇرىلىسىنىڭ توقتاپ قالۋىنا اسەر ەتۋى مۇمكىن ەكەنىن مالىمدەگەن. رەسمي ورىندار ازىرگە اقپاراتقا بايلانىستى تۇسىنىكتەمە بەرمەدى.

باق بەتتەرىندە بەلگىلى بولعانداي، كوكتەم كەزىندە رەيموۆتىڭ ۇستىنەن «اقشا جىمقىرۋ»، «الاياقتىق» فاكتىلەرى بويىنشا ەكى قىلمىستىق ءىس قوزعالعان. «الماتىمەتروقۇرىلىس» كومپانياسىنىڭ قىزمەتكەرلەرى قازان ايىندا دا «رەيموۆتىڭ ىسىنە» قوعامنىڭ نازارىن اۋدارتۋعا تىرىسقان. قازاننىڭ 28-ءى الماتىدا ءباسپاسوز جيىنىن وتكىزگەن قايرات رەيموۆ وزىنە قارسى قوزعالعان ءىستىڭ «تاپسىرىس» ەكەنىن ايتقان.

"The Qazaq Times"