كورنەكى كوللاج. فوتو: ازاتتىق پەن اشىق دەرەككوز

بۇگىن تاڭعى 11:00-دە ەل استاناسىندا ونداعان بەلسەندى ەۋروپا وداعىنىڭ قازاقستانداعى وكىلدىگى عيماراتىنىڭ الدىنا جينالىپ، ەو ديپلوماتتارىنان ءوز نارازىلىقتارىنا نازار اۋدارۋىن سۇرادى.  

وقيعا كۋاگەرى ازاتتىقتىڭ حابارلاۋىنشا, ەكىنشى كۇن شەرۋگە شىققاندار ديپلوماتتارعا شاعىم-تالاپتارىن جەتكىزگىسى كەلەدى. نارازىلار قازاقستاندا ازاماتتاردىڭ نەگىزگى قۇقىقتارى تاپتالىپ جاتقانىن، بيلىك ولاردى قۋعىنداپ، ميتينگ وتكىزۋگە رۇقسات بەرمەيتىنىن ايتادى.

كەشەگى، قاراشانىڭ 26-سى وتكەن جيىن شامامەن ءۇش ساعاتقا سوزىلعان. بىراق وكىلدىكتەن ەشكىم شىقپاعان.

قارسىلىق اكتسياسىنا قاتىسۋشىلار «ساياسي تۇتقىندارعا بوستاندىق!»، «قىتاي ەكسپانسياسىنا جول جوق» دەپ ۇرانداسىپ، ايقايلادى. سونىمەن قاتار شىڭجاڭنان قاشىپ، پانا سۇراپ كەلگەن ەتنيكالىق قازاقتاردى قىتايعا قايتارماۋ قاجەتتىگى ءسوز بولدى. ولار ادام قۇقىعى جانە ازاماتتىق بوستاندىق بۇزىلىپ جاتقان تۇستا قازاقستانمەن ارىپتەستىك ورناتۋعا بولمايدى دەيدى. وكىلدىكتەن بۇگىن دە ەشكىم شىقپاعان.

قازاقستانداعى ەو وكىلدىگىنىڭ ءباسپاسوز قىزمەتىنىڭ تاراتقان مالىمدەمەسىنە سايكەس، ەۋروپا كەڭەسىنىڭ شىعىس ەۋروپا جانە ورتالىق ازيا جونىندەگى جۇمىس توبىنىڭ قازاقستانعا ساپارى اياسىندا ولار ۇكىمەت، پارلامەنت دەپۋتاتتارى جانە باس پروكۋراتۋرا وكىلدەرىمەن كەزدەسكەن.

وكىلدىك سايتىندا جاريالانعان مالىمەتكە سايكەس، نۇر-سۇلتانداعى كەزدەسۋ كەزىندە ەۋروپا وداعى قازاقستاندا بەيبىت شەرۋگە شىققان ادامداردىڭ ۇستالۋ ماسەلەسىنە الاڭداپ، قازاقستاندى "قۇقىق قورعاۋشىلار، جۋرناليستەر مەن ۇكىمەتتىك ەمەس ۇيىم وكىلدەرىنىڭ ەركىن جۇمىس ىستەۋىنە ءارى قاراي دا مۇمكىندىك بەرۋگە" شاقىرعان.

ەو وكىلدىگى قاراشانىڭ 19-ى ەلدە «بەيبىت شەرۋگە شىققان ازاماتتاردىڭ ەش نەگزسىز تۇتقىندالۋى بويىنشا الاڭداۋشىلىعىن ءبىلدىرىپ، قازاقستاندى زاڭگەرلەر، جۋرناليستەر جانە ۇكىمەتتىك ەمەس ۇيىمداردىڭ جۇمىسى ءۇشىن قولايلى ورتانى قالىپتاستىرۋ بويىنشا ءىس-قيمىلداردى جالعاستىرۋعا شاقىرعان».

"The Qazaq Times"