نازارباەۆ نۇر وتان پارتياسىنىڭ كەڭەسىنە قاتىسىپ وتىر. فوتو: ا.ۇكىبايدىڭ twitter پاراقشاسىنان

قازاقستاننىڭ ەكس-پرەزيدەنتى نۇرسۇلتان نازارباەۆتىڭ قاتىسۋىمەن نۇر وتان  پارتياسىنىڭ وڭىرلىك فيليالدارى كولەمىندە كەڭەس ءوتىپ جاتىر.

نازارباەۆتىڭ قازاقشا از جازاتىن ءباسپاسوز حاتشىسى ايدوس ۇكىباي «جيىن بارىسىندا ءسوز العان نازارباەۆ پارتيا مۇشەلەرىنە قازاقستان پرەزيدەنتى قاسىم-جومارت توقاەۆتىڭ اينالاسىنا بىرىگۋدىڭ قاجەتتىلىگىن جانە ساياسي باعىتتىڭ ساباقتاستىعىن جالعاستىرۋدى قايتادان ەسكە سالدى»، – دەپ جازدى ءوزىنىڭ twitter پاراقشاسىندا.

«بيلىكتىك پارتيانىڭ» اۋماقتىق فيلالدارى وكىلدەرىنىڭ باسقوسۋىنا ۇكىمەت باسشىسى اسقار مامين مەن پارتيا جەتەكشىلەرىنىڭ ءبىرى باۋىرجان بايبەك قاتىسىپ جاتىر.

بيىل ەلدەگى ساياسي پروتسەستەردىڭ ۇدەۋى قوعام ساناسىن قوزعاپ، ءار ءتۇرلى قىزۋ ديكۋسسيالار جۇرگەنى ءمالىم. قازاقستاننىڭ ەكس-پرەزيدەنتى نازارباەۆتىڭ ءوز ورنىنا «ۇزاق جىلدار بويى دايىنداعان» توقاەۆتى تاعايىنداۋى، ارتىنشا پرەزيدەنتتىك سايلاۋ، كوپبالالى ايەلدەر مەن جۇمىسشىلاردىڭ جاراسى پىسكەن تالاپتارى... جاستاردىڭ «كرەاتيۆتى» اكتسيالارى، پارتيا قۇرۋعا تالپىنعان تاراپتاردىڭ كوبەيۋى... ەڭ سوڭعىسى، قازاننىڭ 9-ى  مەملەكەت باسشىسى توقاەۆ قول قويعان  اتىشۋلى №184 جارلىعى («قر پرەزيدەنتىنىڭ كەيبىر اكتىلەرىنە وزگەرىستەر مەن تولىقتىرۋلار ەنگىزۋ تۋرالى»)  قوعامدا قىزۋ تالقىعا ءتۇستى. كەيبىر ساراپشىلار «بولماعان بيلىك ءترانزيتىن ەكس-باسشىعا پسەۆدوراسىمدەۋ» دەپ باعالاسا، ازاماتتىق قوعام اراسىندا «قوسبيلىكتىك» تاقىرىبى جەلدەي تارادى. اباەۆ پەن ءۋالي، ارتىنان قارين بىرىنەن سوڭ ءبىرى تۇسىندىرمە بەرۋگە تىرىستى.

بۇعان قاتىستى دوس كوشىم «نازارباەۆتىڭ بيلىكتەن تولىق قول ۇزبەگەنىن كورگەن باسقا ءوزى قويعان ادامدارى، توپتارى، جولداستارى، «حالىق سايلاعان دەپۋتاتتارى»  ازىرگە توقاەۆتىڭ بيلىگىن تولىق مويىندامايدى. مۇندا ادامي، پسيحولوگيالىق فاكتور بار. ...نازارباەۆتىڭ بيلىكتى تولىق بەرمەي ۇستاپ وتىرعان سەبەبى كورشى اتامباەۆ پەن كاريموۆتاردىڭ جايىن كورىپ تاجىريبە بايىتتى» دەگەن بولاتىن. ساياساتكەر «ەكس-پرەزيدەنتتىڭ قالۋىن، اۋەلى – ساياسي مادەنيەتسىزدىك، ەكىنشىدەن، بۇل – ءوزىن قورعاۋى» دەپ باعالاعان.

«بيلىكتىك پارتيانىڭ» اۋماقتىق فيلالدارى وكىلدەرىنىڭ باسقوسۋى. فوتو: ا.ۇكىبايدىڭ twitter پاراقشاسىنان

"The Qazaq Times"