يزرايل ۇكىمەتىن 13 جىلدان بەرى باسقارىپ كەلە جاتقان پرەمەر-مينيستر بەنيامين نەتانياحۋ كەشە باس پروكۋراتۋرا جاعىنان سەنىمسىزدىك، جەمقورلىق، الاياقتىق ىسىمەن ايىپتالدى. مەملەكەت باسشىسىنا تاعىلعان ايىپتى ەلدىڭ باس پروكۋرورى ماندەل بليتت رەسمي مالىمدەمەسىندە ورتاعا سالعان.

ەۆرەي مەملەكەتىنىڭ باسشىسى بەنيامين نەتانياحۋعا ءۇش بىردەي ايىپ قاتار تاعىلىپ، جەمقورلىق جانە الاياقتىق كۇدىگىنە قاتىستى ءۇش ءتۇرلى ءىس قوزعالعان. ايتالىق، نەتانياحۋ جانە ونىڭ ايەلى رەسمي ساپارلاردا جانە كەزدەسۋلەردە قۇنى 260 مىڭ اقش دوللارىنا تەڭ باعالى سىيلىقتاردى قابىلداعان دەلىنگەن. بۇعان قوسا، پرەمەر-مينيستر تۋرالى تەك جاعىمدى جاڭالىقتار تاراتۋ ءۇشىن ەلدەگى ەكى مەملەكەتتىك تەلەارنا باسشىلارىمەن كەلىسسوز جۇرگىزگەن دەگەن كۇدىك ءىلىنىپ وتىر.

دەگەنمەن، يزرايل پرەمەرىنە وسىعان ۇقساس ايىپتار ول بيلىكتە بولعان جىلداردا ءبىر ەمەس، بىرنەشە رەت تاعىلعان. نەتانياحۋ وزىنە تاعىلعان ايىپتارمەن كەلىسپەيتىنىن ايتقان. ول الەۋمەتتىك جەلىدەگى پاراقشاسىندا ءوزىنىڭ ساياسي «قۋدالاۋ كورىپ وتىرعانىن» جازعان. ونىڭ ايتۋىنشا بۇنداي ايىپتاردى ونىڭ ساياسي قارسىلاستارى ويلاپ تاپقان.

يزرايل مەملەكەتىنىڭ زاڭى بويىنشا بۇل ايىپتار پرەمەر-ءمينيستردى دوعارىسقا (وتستاۆكاعا) جىبەرە قويمايدى. بىراق، الداعى سايلاۋدا وعان دەگەن قولداۋدى تومەندەتۋى مۇمكىن.

نەتانياحۋعا تاعىلعان ايىپقا قاراي وتىرىپ، ەۆرەي مەملەكەتىنىڭ بيلەۋشىلەرى اراسىندا تارتىستى ساياسي ويىنداردىڭ ءجۇرىپ جاتقانىن بايقاۋعا بولادى. قىركۇيەكتە نەتانياحۋ كنەسسەتتە كواليتسيالىق ۇكىمەت قۇرا المادى. ونىڭ ەڭ باستى ساياسي قارسىلاسى سانالاتىن ۇلتتىق قورعانىس كۇشىنىڭ بۇرىنعى شتاب باستىعى گانتس سارسەنبىدە مينيسترلەر كابينەتىنىڭ ىستەن شىققانىن ايتقان بولاتىن. ول جانە نەتانياحۋعا تاعىلعان ايىپقا قاراتا وتىرىپ: «بۇل يزرايل ءۇشىن قايعىلى كۇن»، – دەپ جازدى ءوزىنىڭ تۆيتتەر پاراقشاسىنا.

قازىر، يزرايل پارلامەنت مۇشەلەرىنىڭ بىرىككەن ۇكىمەت جاساقتاۋىنا ءبىر ايعا جەتپەيتىن ۋاقىت قالدى. بۇعان قوسا، پرەزيدەنت ريۆلينمەن بىرگە كوپشىلىك ۇكىمەتتى باسقاراتىن پارلامەنت مۇشەسىن سايلادى. بىراق، بۇل ناتيجەنىڭ تابىستى بولۋى ەكىتالاي. پارلامەنت بىرلىككە كەلە الماسا وندا بيىل يزرايلدە ءۇشىنشى رەت جالپى سايلاۋ ءوتۋى مۇمكىن.