"جۋسان" وپەراتسياسى اياسىندا ەلگە ورالعان انا مەن بالا. فوتو: SPutnik / سايەد الي

بۇگىنگى تاڭدا يراك پەن ءسۇريا اۋماعىندا جۇزگە تارتا قازاقستاندىق جۇرگەنى بەلگىلى بولدى.

ازاتتىق سۇراۋ سالدىرعان ۇقك-ءنىڭ جاۋابىندا سوعىس ايماعىندا قازاقستاننىڭ 90-نان استام ازاماتى بار ەكەنى اتىلعان. ونىڭ 63%-ى ايەلدەر كورىنەدى. جۇرگە تارتا كىسىنىڭ 15-ءى (ەكەۋى ەر ادام) لاگەرلەر مەن تۇرمەلەردە جانە 6 ايەل يراكتا قاماۋدا وتىر.

جاۋاپتى ورگاننىڭ دەرەگىنە قاراعاندا، يراك-ءسۇريا ايماعىنان 277 ەرەسەك ادام (57 ەر ادام، 220 ايەل ادام) جانە 547 كامەلەت جاسقا تولماعان بالا كەرى قايتارىلعان. ولاردىڭ قاتارىندا 44 ازاماتقا (34 ەر ادام، 10 ايەل ادام) «تەررور توپقا جانە شەتەلدەگى قارۋلى قاقتىعىسقا قاتىستى»، «تەرروريزمدى ناسيحاتتادى جانە قارجىلاندىردى» دەگەن ايىپپەن ءبىر جىلدان 11 جىلعا دەيىن بوستاندىقتارىنان ايىرىلعان.

ءدىني راديكاليزمنىڭ ءىرى وشاعىنا اينالعان ايماقتاتاردان ورالعان 198 ايەل مەن 545 بالا قازاقستاننىڭ بەيىمدەۋ-وڭالتۋ ورتالىقتارىندا بولعان.

بيىل قازاقستان تاراپى بىرنەشە كەزەڭنەن تۇراتىن «جۋسان» ەۆاكۋاتسيالاۋ وپەراتسياسىمەن بارلىعى 357 قازاقستاندىق بالا ەلگە جەتكىزىلگەن. تاراتىپ ايتقاندا، 9 قاڭتاردا «جۋسان-1» قازاقستاننىڭ 47 ازاماتى، 7 جانە 9 مامىر كۇندەرى «جۋسان-2» 231 ازامات, ولاردىڭ 159-ى – بالا, ال سوڭعى «جۋسان-3» وپەراتسياسىمەن 28-31 مامىردا 67 ايەل، 171 بالا ءسۇريادان ورالعان ەدى.

قاراشنىڭ باسىندا وتكەن قازاقستان ءدىنتانۋشىلارىنىڭ ءحى فورۋمىندا ۇقك تەرروريزمگە قارسى ورتالىق باستىعىنىڭ ورىنباسارى سەرگەي شۆەيكين قازاقستانداعى دەسترۋكتيۆتى اعىمدى ۇستانۋشىلاردىڭ سانى 20 مىڭنان اساتىنىن مالىمدەگەن ەدى.  بىلتىر شىلدەدە قازاقستاننىڭ ۇلتتىق قاۋىپسىزدىك كوميتەتى ءسۇريا مەن يراكتا سوعىس باستالعالى تاياۋ شىعىسقا 800-گە تارتا قازاقستاندىق كەتكەنىن حابارلاعان بولاتىن.

"The Qazaq Times"