كورنەكى سۋرەت. فوتو: اشىق دەرەككوز

الماتىدا جىل باسىنان بەرى 30 كىسى ءيىستى گازدان ۋلانعان.

الماتى قالاسى بويىنشا تاۋارلار مەن قىزمەتتەر قاۋىپسىزدىگى جانە ساپانى باقىلاۋ دەپارتامەنتىنىڭ باستىعى ايزات مولداعاسىموۆا:

– جىل باسىنان بەرى 10 توتەنشە جاعداي تىركەلدى. 30 ادام گازدان جانە جانعان زاتتاردىڭ تۇتىنىنەن ۋلاندى. ونىڭ 19-ى – بالالار. وقيعالاردىڭ بىرىندە تابيعي گاز تارالىپ، اۋا-گاز قوسپاسى جارىلعان. سالدارىنان ەكى ادامنىڭ دەنەسىن (80 - 100%) كۇيىك شالىپ، كوز جۇمدى. ءۇش جاعدايدا 8 ادام اۋىر جاعدايدا اۋرۋحاناعا جەتكىزىلدى، قالعان 7 جاعدايدا – 27 ادام ورتاشا جانە جەڭىل دارەجەدە جاراقات الدى، – دەيدى.

ون توتەنشە جاعدايدىڭ ۇشەۋى 2019 جىلدىڭ قاڭتار-مامىرىندا بولدى. وندا التى ادام زارداپ شەكتى. جەتى جاعداي 1 قازان – 14 قاراشا ارالىعىندا تىركەلدى. بۇل كەزدە 24 ادامعا كومەك كورسەتىلدى.

«بۇل رەتتە، 4 جاعدايدا ادامدار ءيىستى گازعا قاتتى وتىنمەن جاناتىن پەشتەردىڭ اقاۋىنان، 4 جاعدايدا گاز قازاندىقتارىنان گازدىڭ شىعۋىنان جانە ءبىر جاعدايدا ءۇي يەسىنىڭ نەمقۇرايلىلىعىنان باللوننان پروپان گازىنىڭ شىعۋىنان ۋلانعان»، – دەلىنگەن دەپارتامەنت حابارلاماسىندا.

تابيعي گازدىڭ تارالۋىنان ەكى توتەنشە جاعداي ورىن الدى. بىرەۋىندە اۋا-گاز قوسپاسى جارىلىپ، ءبىر ادام مەرت بولدى. ەندى بىرىندە – ۇيدەن ءورت شىعىپ، تۇرعىندار ىستان ۋلانعان.

"The Qazaq Times"