ماكروننىڭ قىتاي ساپارى: قىتاي نارىعى فرانتسۋزدارعا اشىلا ما ؟

بۇگىن فرانتسيا پرەزيدەنتى قىتايداعى ەكى كۇندىك رەسمي ساپارىن باستايدى. «رەيتەر» اقپاراتتىق اگەنتتىگى فرانتسيا پرەزيدەنتىنىڭ ءباسپاسوز حاتشىسىنا سىلتەمە جاساي وتىرىپ، كەزەكتى ساپارىندا پرەزيدەنت ماكرون قىتايدى ءوز مىندەتتەمەلەرىن تولىق ورىنداۋعا شاقىرادى جانە شەتەلدىك كومپانيالاردىڭ قىتاي نارىعىنا شىعۋىنا كوبىرەك مۇمكىندىك بەرۋىن تالاپ ەتەدى دەلىنگەن.

فرانتسيا پرەزيدەنتى ەممانۋەل ماكروننىڭ قىتاي ساپارى شانحاي قالاسىندا ءوتىپ جاتقان 2-ءشى رەتكى حالىقارالىق يمپورتتىق ونىمدەر كورمەسىنە قاتىسۋمەن باستالادى. بۇل كورمەگە ماكرونمەن قاتار ەو-نىڭ بىرقاتار لاۋازىمدى تۇلعالارى دا قاتىسادى.

ماكروننىڭ قىتاي ساپارىنا فرانتسيانىڭ 30 ءىرى كاسىپورىن وكىلدەرى دە بىرگە بارماق. فرانتسيا پرەزيدەنتىنىڭ كومەكشىلەرى مالىمدەمەسىندە كەزەكتى ساپاردا قىتاي نارىعىنا شىعاتىن فرانتسيالىق كومپانيالاردىڭ يمپورتتىق شەكتەۋلەرىن جويىپ، قىتاي نارىعىنىڭ اشىقتىعىنا قول جەتكىزۋدى ماقسات ەتەتىنىن جەتكىزگەن.

باتىس ەلدەرى كوپتەگەن جىلداردان بەرى قىتايدى ادىلەتسىز ساۋدا سوعىسىن جۇرگىزدى دەپ ايىپتاپ ەلەدى. بۇعان قوسا نارىقتا شەتەلدىك كومپانيالارعا وتاندىق كومپانيالارمەن بىردەي مۇمكىندىك بەرمەيدى دەپ تە سىناعان. شەتەلدىك كومپانيالاردىڭ ءوز تەحنولوگيالارىن ءماجبۇرلى تۇردە قىتاي كومپانياسىنا وتكىزىپ بەرۋ سىندى كەلىسىمدەر ارقىلى عانا ءوز نارىعىنا كىرگىزىپ كەلگەن. قىتايدىڭ بۇل ادىلەتسىز ساۋدا ساياساتىنىڭ سوڭى اقش پەن قىتايدىڭ ساۋدا سوعىسىنا الىپ كەلدى.

ايتا كەتۋ كەرەك، فرانتسيا پرەزيدەنتى قىتاي ساپارىنا اتتانۋدان بۇرىن حالىقارالىق ادام قۇقىعىن قورعاۋشى ۇيىم پرەزيدەنت ماكرونعا حات جازعان. حاتتا فرانتسيا پرەزيدەنتىنىڭ كەزەكتى ساپارىندا قىتايداعى ادام قۇقىعىن بۇزىلۋى ماسەلەسىن رەسمي كەزدەسۋدە ورتاعا قويۋ تۋرالى ۇسىنىس جاسالعان. الايدا، فرانتسيا پرەزيدەنتى قىتاي باسشىسىمەن كەزدەسۋدە باتىل قادام جاساپ، ادام قۇقىعى ماسەلەسى كوتەرە قويۋى ەكىتالاي.

“The Qazaq Times”