دەپۋتات: ساياساتتاعى يدەالىم – نازارباەۆ، ەشقاشان وتىرىك ايتىپ كورمەگەنمىن

دەپۋتاتتىق قىزمەتكە كەلگەنىنە  14 جىل 11 اي 24 كۇن بولعان نۇرتاي سابيليانوۆ ءوزىنىڭ ساياساتتاعى كۋميرى ەكس-پرەزيدەنت نازارباەۆ ەكەنىن، بەلگىلى جۋرناليست سەرىك اباس-شاحتىڭ ءاجۋالارىنا ەش رەنجىمەيتىنىن ايتىپ اعىنان جارىلدى.

مۇنى ۋيكيپەديا دا راستايدى: «ساياسي قايراتكەر رەتىندەگى يدەالى – ن.ءا. نازارباەۆ».

نۇرتاي سابيليانوۆ تۋرالى ۋيكيپەدياداعى دەرەك. فوتو: ۋيكيپەديادان سكرينشوت-قيىندى

«ابايدىڭ 45 سۇراعى» جوباسىندا العاش ەڭبەك جولىن قۇرىلىسشىلىقتان باستاعان ءماجىلىس دەپۋتاتى «پارلامەنتتەگىلەرگە شاڭ جۋىتپاۋعا» تىرىسىپ، «دەپۋتاتتارعا حالىقتىڭ سەنىمى جوعالعانىن» جوققا شىعاردى. ونىڭ سوزىنشە، مۇنداي ويلار «حالىق ەمەس، جەكەلەگەن ادامداردىڭ پىكىرى». ءبىر قىزىعى، بەينەماتەريالدىڭ پىكىرلەر بولىگىندە بىلدىرىلگەن 35 پىكىردىڭ تەك بىرەۋى عانا ءپوزيتيۆتى. «سۋايت»، «ناشار ۋازىرلەر»، «سونشا ۋاقىت قايدا ءجۇردىڭ»، «مەنىڭ كۇلكىم كەلەدى»، اقىن شاحانوۆتىڭ «تج» ۇعىمى ت.ب. كومەنتاريلەر «حالىقتان ەمەس، حەيتەرلەردەن» دەپ قابىلدايتىن بيلىكشىل بلوگەرلەر تابىلارى ءسوزسىز.

دەپۋتات نۇرتاي سابيليانوۆ بۇعان دەيىن ءوزى تۋرالى 6 كىتاپ جارىق كورگەنىن («نامىس نايزاعايى» (1996 ج.), «نۇرتاي» (2001 ج.), «شاپاعات» (2004 ج.), «پارىز» (2008 ج.), «ەل اماناتى» (2008 ج.), جۋىردا تاعى 3 ەڭبەك  جارىق كورەتىنىن ايتىپ قالدى. سۇحبات الدىن-الا دايىندالعانى بايقالادى. بىراق «حالىق قالاۋلىلارىنىڭ» اشىق قوعامعا شىعۋىنىڭ ءوزى زور جەتىستىك دەپ ساناماسقا شارا نە؟!

"The Qazaq Times"