بەيبىت كۇندەگى سارباز ءولىمى: قازاقستان اسكەرىندەگى كەزەكتى "سۋيتسيد"

جاۋاپتى ورگاندار تارازدا ۇيىنە قايتۋعا ەكى اي قالعان ۇلتتىق ۇلاننىڭ ساربازى اسىلعان كۇيدە تابىلعان دەيدى. 

تارازداعى «قازاقستان رەسپۋبليكاسى ۇلتتىق ۇلانىنىڭ 5513 اسكەري ءبولىمى» رمم. تاراز قالاسى، جامبىل وبلىسى. فوتو: قازاقپارات

تاراز قالاسىنداعى جانىبەك ساعاديەۆ باسشىلىق ەتەتىن («قازاقستان رەسپۋبليكاسى ۇلتتىق ۇلانىنىڭ 5513 اسكەري ءبولىمى» رمم) 5513 اسكەري بولىمىندە سارباز بولات باتىرحاننىڭ دەنەسى اسكەري بولىمدەگى ەكى عيمارات قۋىسىنداعى بيىك تەمىرگە اسىلىپ تۇرعان جەرىنەن تابىلعان دەسەدى. اقتوبەلىك جاۋىنگەردىڭ ۇيىنە ورالۋىنا نەبارى ەكى اي قالعان ەكەن.

قر ۇلتتىق ۇلانى «وڭتۇستىك» وڭىرلىك قولباسشىسىنىڭ ورىنباسارى نيازتاي الكەشوۆ  اۋىر قايعىعا قاتىستى «وقيعا تەكسەرىلىپ جاتىر. ءمان-جايدى انىقتايتىن بولامىز. ەڭ سوڭعى شەشىم تەرگەۋ اياقتالعاندا بەلگىلى بولادى», – دەدى.

«دەنەسىندە بىردە-ءبىر سوققىنىڭ ءىزى جوق» دەگەن اسكەريلەردىڭ سوزىنشە بولات باتىرحان ۇزدىك سارباز بولعان. ونىڭ سۋرەتى ماقتاۋلى جاۋانگەرلەردىڭ قاتارىنان تۇسپەگەن.

بۇعان دەيىن دە 20 جىلعا جۋىق جاۋىنگەر دايىنداپ جۇرگەن تاپ وسى اسكەري بولىمدە ەستىگەننىڭ جۇرەگىن قىنجىلتاتىن قايعىلى جاعداي تىركەلگەنىن ەستەرىڭىزگە سالامىز. ءۇش جىل بۇرىن پراپورششيك قارۋ-جاراق قويماسىندا ءوزىنىڭ تابەلدىك تاپانشاسىنان وق اتىپ، كوز جۇمعان بولاتىن.

سارباز ولىمىنە قاتىستى جاعداي وتكەن جەكسەنبى اتىراۋدا ورىن العان بولاتىن. ۇلتتىق قاۋىپسىزدىك كوميتەتىنىڭ اتىراۋ قالاسىنداعى «2016 اسكەري ءبولىمىنىڭ» ساربازى، مارقۇم اسكەري بولىمگە 16 قازان كەلگەنىنە قاراماستان، ارادا 10 كۇن وتپەي مەنينگوكوكك ينفەكتسياسىمەن جانساقتاۋ بولىمىنە ءتۇسىپ، ءبىر كۇندە قايتىس بولىپ كەتتى.
قازاقستاندا اسكەردەگى ءولىم تۋرالى اقپارات ءجيى شىققانمەن ارنايى ستاتيستيكا جوق. بەيبىت كۇندە ەش سوعىس جاعدايىنسىز اسكەرگە اياق-قولى بالعاداي، ساپ-ساۋ بولىپ بارعان جاس جىگىتتەر تابىتپەن نەمەسە مۇگەدەك كۇيدە ورالۋىنىڭ جيلەۋى بۇقارانىڭ قورعانىس سالاسىنا سەنىمىن السىرەتكەن.

"The Qazaq Times"