فوتو: https://golos.ua

بارسەلونادا كاتالونيا تاۋەلسىزدىگىنىڭ جاقتاستارى ۇيىمداستىرعان نارازىلىق اكتسياسى قاقتىعىسقا ۇلاستى. ەرەۋىل باستالعالى كەم دەگەندە 44 ادام زارداپ شەككەن. بۇل جونىندە Deutsche welle حابارلادى.

قالا كوشەلەرىنە شىققان نارازى جۇرت يسپانيا جوعارعى سوتىنىڭ كاتالونيالىق ساياساتكەرلەرگە قاتىستى شىعارعان ۇكىمىنە قارسىلىق بىلدىرۋدە. قۇقىق قورعاۋ ورگاندارىنىڭ مالىمەتى بويىنشا ەرەۋىلگە جالپى سانى 350 مىڭعا جۋىق ادام قاتىسقان. نارازىلىق اكتسياسىنىڭ قاتىسۋشىلارى ءتارتىپ ساقشىلارىنا شولمەكتەر لاقتىرىپ، كونتەينەرلەردى ورتەگەن. سول سەبەپتى قۇقىق قورعاۋ ورگاندارىنىڭ قىزمەتكەرلەرى حالىققا كۇش قولدانعان. قازىرگى ۋاقىتتا ءتارتىپ بۇزدى دەگەن ءۇش ادام تەرگەۋگە الىندى. بۇدان كەيىن 10 مىڭعا جۋىق مانيفەستانتتار بارسەلوناداعى پوليتسيا باسقارماسى عيماراتىنىڭ جانىندا ميتينگ ۇيىمداستىردى.

14 قازاننان باستاپ كاتالونيانىڭ ءتۇرلى قالالارىندا نارازىلىق شەرۋلەرى ءوتىپ جاتىر. قارسىلىق اكتسيالارى 2017 جىلى تاۋەلسىزدىك تۋرالى رەفەرەندۋمدى جاريالاۋعا اتسالىسقان كاتالونيالىق ساياساتكەرلەردى 13 جىلعا دەيىن تۇرمەگە قاماۋ جونىندە سوت ۇكىمىنە قارسى باستالعان. بۇگىنگە دەيىن وتكەن ارازىلىق اكتسيالارى قاقتىعىستارعا ۇلاسىا، جۇزدەگەن ادام زارداپ شەككەن.

بيىل ساۋىردە يسپانيادا وتكەن ءىرى شەرۋدەن كەيىن يسپانيا بيلىگى سەپاراتيستەردى جاپپاي تەرگەۋگە العان سوڭ، سەپاراتيستەردى جاقتاۋشىلار سوت عيماراتىنىڭ جانىندا دەمونستراتسيا وتكىزدى. وسى جاعدايدان كەيىن يسپانيا پرەمەر-ءمينيسترى پەدرو سانچەس ەلدەگى كورتەستەر تاراتىلىپ، مەرزىمىنەن بۇرىن سايلاۋ وتەتىنى تۋرالى رەسمي مالىمدەمە جاساعان بولاتىن. ەلدىڭ پرەمەر-ءمينيسترى سانچەس ءوز ۋادەسىن ورىنداماعاندىقتان، كاتالوندىق پارتيالار ۇكىمەتتىك وداقتان شىعىپ كەتكەن بولاتىن. ناتيجەسىندە، كەزەكتى مارتە جاڭا سايلاۋ وتكىزىلدى. بيلىكتەگى ءوزارا كەلىسپەۋشىلىك سالدارىنان يسپانيا پارلامەنتىنىڭ نەگىزگى پارتياسى قيىن جاعدايعا قالدى.

رەسمي مالىمەتتەر بويىنشا، 2018 جىلى كاتولونيا داعدارىسى يسپانيا ەكونوميكاسىنا 1 ملرد ەۋرو شىعىن كەلتىرگەن. نەگىزىنەن كاتالونيانىڭ يسپانيادان ءبولىنىپ شىعۋعا قاتىستى ارەكەتى 2017 جىلى قازاندا باستالعان. مەملەكەتتىڭ تاۋەلسىزدىك ءۇشىن كۇرەسى 2018 جىلى جاڭا سيپات الدى. سەبەبى تاۋەلسىزدىك ءۇشىن بولعان وڭىرلىك سايلاۋدا سەپاراتيستەردىڭ داۋىسى باسىم ءتۇستى. ال وسىدان كەيىن يسپانيا ۇكىمەتىنىڭ باسشىسى ماريانو راحوي كاتالونيا ۇكىمەتىنىڭ باسشىسى كارلەس پۋدجەمونت پەن ءبىراز ساياساتكەرلەردى قىزمەتتەرىنەن شەتتەتكەن ەدى.

ايتا كەتەيىك، كاتالونيا – ءوزىنىڭ سالت-ءداستۇرى مەن ءتىلى، 7,5 ملن حالقى بار اۆتونوميا. فرانتسيامەن شەكتەسەدى جانە يسپانيا ءوندىرىسىنىڭ بەستەن ءبىر بولىگىن قۇرايدى. ال ەگەر كاتالونيا دەربەس مەملەكەت بولاتىن بولسا، وندا ونىڭ ءجىو پورتۋگاليا مەن فينليانديا ەلدەرىنىڭ كورسەتكىشىمەن تەڭ بولۋى مۇمكىن.

"The Qazaq Times"