گەرمانيا كانتسلەرى انگەلا مەركەل جانە رەسەي پرەزيدەنتى ۆلاديمير پۋتين. فوتو: https://politobzor.net

گەرمانيا پارلامەنتى سولشىل پارتيانىڭ رەسەيگە ەنگىزىلگەن سانكتسيالاردى جەڭىلدەتۋ تۋرالى ۇسىنىسىن قابىلداعان جوق. بۇل جونىندە ءتيىستى حابارلاما گفر پارلامەنتىنىڭ سايتىندا جاريالاندى.

سولشىلدار فراكتسياسى فەدەرالدى ۇكىمەتتى رەسەيگە قارسى ەكونوميكالىق سانكتسيالاردىڭ بىرقاتار بولىمدەرىن جويىپ، ەۋروپالىق وداق تاراپىنان قولداۋ كورسەتۋدى ۇسىنعان. وسى جونىندە وتكەن جيىندا گەرمانياداعى وزگە دە پارتيالار رەسەيگە قارسى سانكتسيالاردى جەڭىلدەتۋ «ماقساتقا قول جەتكىزۋگە مۇمكىندىك بەرمەيتىنىن، ەكونوميكالىق تۇرعىدا پايداسىز جانە ماسەلەگە تولى» ەكەنىن ايتتى.

ماسكەۋگە قاتىستى ماسەلەدە حريستيان-دەموكراتيالىق جانە حريستيان-الەۋمەتتىك وداقتارىنىڭ فراكتسيالارى، گەرمانيانىڭ سوتسيال-دەموكراتيالىق، ەركىن دەموكراتيالىق پارتياسى، «جاسىلدار» جانە «گەرمانيا التەرناتيۆى» پارتيالارى قارسى داۋىس بەرگەننەن كەيىن، بۋندەستاگ سولشىلدار ۇسىنىسىن كەرى قايتاردى.

نەگىزىنەن گەرمانيانىڭ سولشىل پارتياسى رەسەيدى قولداپ، ماسكەۋدى وقشاۋلاۋعا تۇبەگەيلى قارسىلىق ءبىلدىرىپ كەلگەن. 2015 جىلى گەرمانيا سولشىل پارتياسىنىڭ بۋندەستاگتاعى فراكتسياسىنىڭ جەتەكشىسى گرەگور گيزي ماۋسىم ايىندا وسى ەلدە وتەتىن «ۇلكەن جەتىلىك» ەلدەرى سامميتىنە رەسەي پرەزيدەنتى ۆلاديمير ءپۋتيندى شاقىرۋ تۋرالى كانتسلەر انگەلا مەركەلگە ۇسىنىس ايتقان. DPA اگەنتتىگىنە سۇحبات بەرگەن گيزي «داعدارىستاردى رەسەيسىز شەشۋ مۇمكىن ەمەس بولعاندىقتان، «جەتىلىكتى» قايتادان «سەگىزدىككە» اينالدىرعان ءجون. رەسەيدى وقشاۋلاپ ۇستاۋ زياننان باسقا ەشقانداي پايدا اكەلمەيدى» دەپ مالىمدەگەن. ول يراننىڭ يادرولىق باعدارلاماسىنا قاتىستى كەلىسسوزدەر بارىسىندا جانە سيريانىڭ حيميالىق قارۋىن جويۋدا ءپۋتيننىڭ «دۇرىس رول اتقارعانىن» ايتقان.

گرەگور گيزي سونىمەن بىرگە ۋكرايناداعى جانجالدى رەتتەۋگە كسرو-نىڭ بۇرىنعى پرەزيدەنتى ميحايل گورباچەۆتى ارااعايىندىققا تارتۋدى ۇسىنىپ، «گورباچەۆسىز بۇكىل شىعىس ەۋروپادا دەموكراتيالىق وزگەرىستەر بولماس ەدى» دەگەن.

"The Qazaq Times"