پاكتۋسان تاۋىنداعى كيم. فوتو: Reuters,

اق بوز اتتى مىنگەن كيم جوڭ ۋن الەم نازارىن اۋداردى. سولتۇستىك كورەيا ليدەرى اقبوز اتقا ءمىنىپ، ەلىندەگى 2750 مەتر بيىكتىكتەگى پاكتۋسان تاۋىنا شىققانىن رەسمي باسىلىمدارى تاراتتى. كحدر ليدەرىنىڭ بۇل ارەكەتى نە ءۇشىن جۇرت نازارىن اۋدارۋى مۇمكىن؟

پاكتۋسان تاۋى سولتۇستىك كورەياداعى ەڭ بيىك تاۋ جانە ول ەلىنىڭ سيمۆولى قاتارىندا باعالانادى. وعان قوسا كيم اۋلەتى ءۇشىن دە سيمۆولدىق مەكەن دەۋگە بولادى. كيم جوڭ ۋن ءار رەت ماڭىزدى مالىمدەمە جاساۋدان بۇرىن اتالعان بيىك تاۋعا بارىپ قايتاتىنىن بىرقاتار ەلدىڭ اقپارات قۇرالدارى جازىپ جاتىر. ايتالىق، 2017 جىلى كيم جوڭ ۋن پاكتۋسان ساپارىنان كەيىن وڭتۇستىك كورەيامەن مامىلەنى جاقسارتاتىنىن بىلدىرگەن.

قىستىڭ العاشقى قارى جاۋىپ جاتقان كورەي تۇبەگىندەگى بيىك تاۋدا اق بوز اتپەن قۇيعىتىپ جۇرگەن كيمنىڭ سۋرەتتەرى ءبىر قاراعاندا ايبىندى كورىنەدى. ليدەرلەرىن «ءتاڭىردىڭ ۇلىنداي» سۋرەتتەۋگە قۇمار رەسمي باسىلىمدارى بۇل رەتتە دە ءتىلىنىڭ جەتكەن جەرىنە دەيىن ماقتاپ جاتسا كەرەك-ءتى. الايدا، مەيلىنشە ادەبي سوزدەرمەن كوركەمدەلگەن حاباردىڭ سوڭىندا «كيم مىرزامەن بىرگە بارعان رەسميلەر الەمدى تاڭ قالدىراتىن جاڭا قادام بولادى دەپ سەنگەنى» تۋرالى جازىلعان.

"مىنگەنىم استىمداعى اقبوز اتىم". فوتو: "رەيتەر".

كيم جوڭ ۋننىڭ ماڭىزدى ساياسي شەشىمدەر الدىندا پاكتۋسانعا باراتىنىن ەسكەرە وتىرىپ، ساراپشىلار ءتۇرلى بولجامدار جاساپ باعۋدا. بىرقاتار ساراپشىلار كيم جوڭ ۋن ۇزاق قاشىقتىققا ۇشاتىن زىمىراندار مەن يادرولىق قارۋ سىناعىن توقتاتۋ تۋرالى ۋادەسىن قايتىپ الۋى مۇمكىن دەپ قاۋىپتەنەدى.

كوپشىلىككە بەلگىلى، اقش پەن سولتۇستىك كورەيا اراسىنداعى بەيبىتشىلىك ورناتۋ ماقساتىنداعى كەلىسسوزدەر تىعىرىققا تىرەلدى. اقش پرەزيدەنتتەرى قاتارىندا كحدر-مەن بەلسەندى كەلىسسوز جۇرگىزگەن ترامپ اكىمشىلىگى بولدى. بىراق، قازىر ترامپ ۇكىمەتى ىشكى-سىرتقى كوپتەگەن قايشىلىقتارعا تاپ بولعانىن بىلەمىز. ەلدە ترامپتىڭ يمپيچمەنتى ماسەلەسى بولسا، سىرتتا اقش-قىتاي ساۋدا سوعىسى، اقش-يران قايشىلىعى، ءسۇريادان اسكەر شىعارۋ سىندى بىرقاتار ماسەلەلەردە اق ءۇي باسشىلىعى قارسىلىقتارعا تاپ بولدى. بۇل ەسەسىنە اقش-كحدر اراسىنداعى كەلىسسوزدەردى كەشەۋىلدەتۋدە.

كەيبىر ساراپشىلار، سولتۇستىك كورەيا باسشىسى تاۋعا شىعىپ، ماڭىزدى قادام الدىنداعى تاۋ ساياحاتى ارقىلى ترامپ ۇكىمەتىنىڭ نازارىن وزىنە اۋدارۋدى ويلاپ وتىر دەپ قارايدى. سولتۇستىك كورەيا يادرولىق قارۋسىزدانۋ جوباسىن جاساپ شىعارۋ ءۇشىن اقش-تان جىل سوڭىنا دەيىن ۋاقىت سۇراعان. كيم جوڭ ۋن بولسا يادرولىق قارۋسىزدانۋدان بۇرىن سانكتسيالاردى الىپ تاستاۋ تۋرالى بىرنەشە رەت ايتقان ەدى. ترامپ ۇكىمەتى بۇعان كەلىسىم بەرمەدى.

قالاي بولسا دا، كيمنىڭ اقبوز اتپەن تاۋعا شىعۋى اق ءۇيدىڭ نازارىن اۋدارتپاي قالمادى. كيم بۇل جولى تاعى بىرنەشە زىمىران سىناعىن جوسپارلاعان بولۋى دا مۇمكىن نەمەسە جاي عانا العاشقى قاردى قىزىقتاپ سەيىل-سەرۋەن قۇرىپ قايتقان بولۋى دا مۇمكىن.