اقش قىتاي ۇكىمەتى مەن كوممۋنيستىك پارتياسىنىڭ وكىلدەرىنە ۆيزالىق شەكتەۋ قويدى. اقش مەملەكەتتىك حاتشىسى مايك پومپەو بۇل شارا قىتاي ۇكىمەتىنىڭ شىنجاڭداعى از ساندى ۇلتتارعا قىسىم كورسەتۋ ارەكەتىنە قارسى جاسالعانىن مالىمدەدى.

«قىتاي ۇكىمەتى شىنجاڭ ۇيعىر اۆتونوميالى رايونىندا جاسايتىن ۇيعىر، قازاق، قىرعىز جانە وزگە دە مۇسىلمان ازشىلىق وكىلدەرىن جاپپاي لاگەرلەرگە قاماۋ، كەڭ كولەمدە جوعارى تەحنيكالىق باقىلاۋدا ۇستاۋ، ءدىني جانە مادەني سالتتارىن ۇستانۋعا قاتاڭ شەكتەۋلەر قويۋ، سىرتقا شىققان قىتاي ازاماتتىعىنداعى تۇلعالاردى كۇشتەپ ەلگە قايتارىپ جازالاۋ جانە باسقا دا كوپتەگەن رەپرەسسيالىق ارەكەتتەر جاساپ كەلدى»، – دەدى پومپەو مالىمدەمەسىندە.

مالىمەتتەرگە قاراعاندا، ۆيزالىق شەكتەۋ قىتاي ۇكىمەتى مەن كوممۋنيستىك پارتياسىنىڭ وتباسى مۇشەلەرىنە دە قويىلۋى مۇمكىن.

وسى شارامەن قاتار، اقش قىتاي ۇكىمەتىن شىنجاڭداعى رەپرەسسيۆتى ارەكەتتەرىن توقتاتۋعا، شەتەلدەگى قىتاي ازاماتتىعىنداعى مۇسىلمانداردى قۋدالاۋ، ولاردى كۇشتەپ ەلگە قايتارۋ سىندى ارەكەتتەردى توقتاتۋعا شاقىردى.

ايتا كەتەيىك، اقش ۇكىمەتى شىنجاڭداعى ماسەلەگە بايلانىستى قىتاي ۇكىمەتىنىڭ لاۋازىمدىلارىن سانكتسيا تىزىمىنە قوسۋ شاراسىن بۇدان بۇرىن دا كوتەرگەن. الايدا، بەيجىڭنىڭ «جاۋلىق ارەكەت ارقىلى جاۋاپ قايتارۋىنان» الاڭداپ، ترامپ اكىمشىلىگى جاعىنان بۇل شارا كەيىنگە قالدىرىلعان.

قىتاي ۇكىمەتى شىنجاڭدا 1 ملن-نان استام از ساندى ۇلت وكىلدەرىن لاگەرلەرگە قاماعانى تۋرالى بۇۇ رەسمي مالىمدەمەسىندە ايتىلعان. بۇدان تىس، BBC سەكىلدى ىقپالدى اقپارات قۇرالدارى شىنجاڭ جەرىندە از ساندى ۇلت وكىلدەرىنە جاسالىپ جاتقان «ماسقارا» ارەكەتتەردىڭ بەتىن اشقان بولاتىن. بۇدان ءبىر اي بۇرىن وسىنداي حابارلاردىڭ بىرىندە از ساندى ۇلت وكىلدەرىنىڭ بالالارىن اتا-انالارىنان كۇشتەپ ايىرىپ جاتقانى تۋرالى دا مالىمەتتەر بەرىلگەن.

“The Qazaq Times”