شابۋىل الدىنداعى دايىندىق. فوتو: AFP.

تۇركيا كۇردتەر قونىستانعان سيريا ايماعىندا قارۋلى وپەراتسياسىن باستاعانى بەلگىلى بولدى. كۇردتەر قونىستانعان كەيبىر اۋداندار مەن قالاشىقتارعا تۇرىك سوعىس ۇشاقتارى اۋە سوققىسىن جاسادى. بۇدان كەيىن ارتيللەريامەن اتقىلاعان. سوڭىندا جاياۋ اسكەرلەر شابۋىلعا شىققان. تۇركيانىڭ شابۋىلىنان كەيىن وڭىردە بىرقاتار دۇربەلەڭدەر دە بولدى.

كەشە عانا تۇركيا پرەزيدەنتى «بەيبىتشىلىك كوكتەمى» اتالعان شارانى باستاعاندارىن، ونىڭ ماقساتى تۇركياعا تونەتىن تەرروريزم قاۋپىن جويۋ ەكەنىن ايتقان بولاتىن.

تۇركيا مەن اقش اراسىنداعى كەيبىر ساياسي ويىنداردا جيىلەي تۇسكەندەي. باستابىندا اقش تۇركيانىڭ بۇل اسكەري ارەكەتىنە «جاسىل شىراق جاقتى». الايدا، تۇركيا اسكەري دايىندىعىن تامامداپ، شابۋىلعا وتكەن كەزدە ۋاشينگتون تارابىنان ايىپ پەن سىن داۋىسى دا ەستىلدى.

تۇرىك سوعىس ۇشاقتارى ەڭ الدىمەن كۇردتەر قونىستانعان راس-ءال-اين قالاسىنا اۋە شابۋىلىن جاسادى. كۇردتەر باسقارۋىنداعى سيريا دەموكراتيالىق ارمياسى (سدك) اتالعان قالاعا اۋە شابۋىلى جاسالعانىن حابارلادى جانە تۇركيا اۋە كۇشتەرى بەيبىت تۇرعىنداردى نىساناعا الدى دەپ ايىپتادى. سونداي-اق، سدك ايماقتا دۇربەلەڭ باستالعانىن جەتكىزدى.

تۇركيا شابۋىلىنان كەيىن كۇردتەر قونىس اۋدارۋعا ءماجبۇر بولدى. فوتو: VOA

سيريانىڭ كەيبىر وپپوزيتسيالىق اقپارات قۇرالدارى كەمىندە 6 ەلدى مەكەنگە شابۋىل جاسالعانىن جازىپ جاتىر. شابۋىلدان كەيىن شەكاراعا جاقىن ايماقتاعى تۇرعىندار وڭتۇستىككە قاراي بوسىپ كەتىپ جاتقانىن دا ايتۋدا. كەيبىر مالىمەتتەردە باس پاناسىن تاستاپ قونىس اۋدارۋ شابۋىلدان بىرەر كۇن بۇرىن باستالىپ كەتكەنىن ايتادى.

تۇركيانىڭ شابۋىلىنان كەيىن قونىس اۋدارعان كۇردتەر. فوتو; AFP/BBC.

حالىقارالىق ۇيىمدار وڭىردە الەۋمەتتىك داعدارىس تۋىلۋى مۇمكىن دەپ ەسكەرتۋدە. بۇنداي ەسكەرتۋ ەكى كۇن بۇرىن بۇۇ تاراپىنان دا جاسالعان. ولار ايماقتاعى بوسقىندار لاگەرىندە جاساپ جاتقانداردىڭ تاعدىرى تۋرالى الاڭداۋشىلىق بىلدىرۋدە.

سيرياداعى قازىرگى تەرروريتوريالىق جاعداي. فوتو: The Qazaq Times

سيريانىڭ سولتۇستىگىندە از ساندى امەريكالىق اسكەرلەر بولعان. ولار سيريالىق وپپوزيتسيالىق كۇشتەر جانە كۇرد قارۋلى كۇشتەرىمەن بىرگە «يسلام مەملەكەتى» تەررورلىق ۇيىمىنا قارسى ناتيجەلى سوعىستار جۇرگىزگەن. ال، تۇركيا قارۋلى كۇشتەرى ايماققا كىرەردىڭ الدىندا اقش پرەزيدەنتى امەريكالىق جاۋىنگەرلەردى وڭىردەن الىپ كەتۋ شەشىمىن جاساعان. تەرروريزمگە قارسى وداقتاسى كۇردتەر اقش-تىڭ بۇل ارەكەتىن «تۋ سىرتىنان پىشاق سالۋ» دەپ باعالاپ جاتىر.

بۇعان جاۋاپ رەتىندە ترامپ تۇركياعا ەسكەرتۋدە جاساعانى دا بەلگىلى. «تۇركيا شەكتەن شىعىپ كەتسەك، ەلدىڭ ەكونوميكاسىن تاس-تالقان ەتەمىن»، – دەگەن پرەزيدەنت ترامپ. ال، ەۋروپا تارابى تۇركياعا وپەراتسيانى توقتاتۋ تۋرالى ەسكەرتۋ جاسادى. ناتو باس حاتشىسى دا ماسەلەگە بايلانىستى سويلەسۋلەر ءۇشىن تۇركياعا بارعانى انىق بولدى. قازىرگە وڭىردەگى جاعداي وسىلاي. تۇركيا ءوزى ويلاعانداي قاۋىپسىزدىك ايماقتى قۇرىپ شىعا الا ما، ونى الداعى ۋاقىت كورسەتپەك.

“The Qazaq Times”