تۇركيا ەۆفراتتىڭ شىعىسىندا اسكەري وپەراتسيا باستاۋ الدىندا تۇر. فوتو: انادولى.

تۇركيا قارۋلى كۇشتەرى رەسمي مالىمدەمە جاساپ، ءسۇريانىڭ سولتۇستىك-شىعىس اۋماعىندا اسكەري وپەراتسيا دايىندىعى جاسالىپ بولعانىن حابارلادى. مالىمدەمەدە، قارۋلى وپەراتسيا ەۆفرات وزەنىنىڭ شىعىس جاعالاۋىندا باستالاتىنى ايتىلعان.

تۇركيا قورعانىس مينيسترلىگى تاراتقان مالىمدەمەدە وپەراتسيانىڭ ماقساتى تۋرالى: «ايماقتىق قاۋىپسىزدىكتى قامتاماسىز ەتۋ جانە سۇريالىق بوسقىنداردى بەيبىت ايماققا ورنالاستىرۋ ماقساتىندا قارۋلى وپەراتسيالار جۇرگىزىلەدى»، – دەلىنگەن.

سونداي-اق، حابارلامادا: «تۇرىك قارۋلى كۇشتەرى تۇركيانىڭ قاۋىپسىزدىگى، 82 ملن حالىقتىڭ اماندىعى ءۇشىن ەلىمىزگە قاۋىپ توندىرەتىن بارلىق تەررورلىق توپتارعا قارسى كۇرەسەدى»، – دەلىنەدى.

تۇركيا اتالعان وپەراتسيانى باستاۋدان بۇرىن رەسەي جانە يران باسشىلارىنىڭ قاتىسۋىمەن «ۇشتىك ءسامميتىن» وتكىزدى. سونداي-اق، ءسۇريا جەرىندەگى قارۋلى ارەكەتتەر تۋراسىندا اقش ۇكىمەتىمەن دە كەلىسىمدەر الىپ بارعان. ماسكەۋ مەن ۋاشينگتون تارابى تۇركيانىڭ قارۋلى ارەكەتتەرىنە قارسىلىق بىلدىرگەن جوق.

“The Qazaq Times”