«ىسكەرلىك جۋرناليستيكا» كىتابى تانىستىرىلدى

الماتىدا «ىسكەرلىك جۋرناليستيكا» كىتابىنىڭ تۇساۋكەسەرى ءوتتى.

شارا بارىسىندا جوبا اۆتورى ەربول ازانبەك: «ەكونوميكا، قارجى، بيزنەس تاقىرىبىندا قازاق ءتىلدى باق ءجيى جازا بەرمەيدى. بىراق وقىرماننىڭ سۇرانىسى وراسان. وسى ولقىلىقتىڭ ورنىن تولتىرۋ ماقساتىمەن سوڭعى 4 جىلدا «ىسكەرلىك جۋرناليستيكا مەكتەبى» كۋرسى، 7kun.kz ىسكەر جاڭالىقتار سايتىن اشتىق. كۋرستا جاس جۋرناليستەردى دايىنداپ، جەكە سايتىمىزدا تاجىريبە جيناتىپ، ۇلكەن باق-نا جىبەرىپ وتىرۋ نەگىزگى ۇستانىمىمىز. بۇل ارقىلى قازاق تىلىندە ىسكەرلىك تاقىرىپتا جازاتىن جۋرناليستەر توبىن قالىپتاستىرۋ باستى ماقساتىمىز. الايدا تۇبەگەيلى وزگەرىس ءۇشىن بۇل دا از. سوندىقتان جۋرناليستەرگە نۇسقاۋلىق تۇرىندە «ىسكەرلىك جۋرناليستيكا» كىتابىن قۇراستىرۋدى شەشتىك. ونى جازۋ بارىسىندا ورال، شىمكەنت قالالارىنداعى جۋرناليستەرمەن كەزدەستىك، سونداي-اق باق وكىلدەرىنىڭ پىكىر، ۇسىنىستارىن جينادىق. سونىڭ نەگىزىندە كىتاپ جازىلدى. قازاقستانداعى اقش ەلشىلىگىنىڭ قولداۋىمەن جارىق كورگەندىكتەن كىتاپتى قازاقستانداعى مەديا ۇيىمدارعا، جۋرناليستيكا فاكۋلتەتتەرىنە تەگىن تاراتامىز جانە قالاعان ادام ەلەكتروندى نۇسقاسىن 7kun.kz سايتىنان جۇكتەپ الا الادى. بۇل جوبانى قولداپ، اينالامىزدى وزگەرتۋگە مۇمكىندىك بەرگەن ازاماتتارعا العىسىم شەكسىز»، – دەدى.

مىڭ دانامەن جارىق كورگەن كىتاپ «ەكونوميكا، قارجى، بيزنەس تاقىرىپتارىندا قالاي جازۋعا بولادى؟» دەگەن سۇراققا جاۋاپ جانە مەديا وكىلدەرى ءۇشىن ناقتى كەڭەستەر بەرەدى. كىتاپتى جازۋعا شولپان ايتەنوۆا، اسيا اكيشەۆا، ەسەنگۇل كاپقىزى، اسحات ەركىمباي، اليبەك اللياروۆ، دىنمۇحامەد زيادين سىندى بەلگىلى مەديا ماماندارى قاتىسقان. ميرا حالينا، ولەگ حە، اينۋرا كارگالينوۆا، گۇلزات نۇرمولداقىزى سىندى بەلگىلى جۋرناليستەر تاجىريبەسىمەن بولىسكەن.

"The Qazaq Times"