قىتاي باسشىسى شي جينپيڭ اسكەرلەرگە امانداسۋدا. فوتو: REUTERS.

 

بۇدان بىرەر ساعات بۇرىن بەيجىڭدە قىتاي حالىق رەسپۋبليكاسى قۇرىلعاندىعىنىڭ 70 جىلدىعىنا ارنالعان سالتاناتتى شارا باستالدى.

بۇدان 70 جىل بۇرىن ءدال وسى كۇنى قىتايداعى ازاماتتىق سوعىستا گومينداڭ بيلىگىن ەلدەن قۋىپ شىققان كوممۋنيستىك پارتيا قحر-نىڭ قۇرىلعانىن جاريالاعان بولاتىن. بۇل كۇندە قىتاي ەكونوميكالىق جاقتان دامىعان، الايدا ازاماتتىق جانە ساياسي قۇقىقتار شەكتەلگەن اۆتوريتارلىق مەملەكەت.

سوڭعى 30 جىلداعى قىتاي باسشىلارى. فوتو: رەيتەر.

سوعان قاراماستان سالتاناتتى شارانىڭ باستالۋىندا قىتاي باسشىسى شي جينپيڭ قىسقاشا مالىمدەمە جاساپ، «قكپ ءۇشىن ءوز ازاماتتارى ءبىرىنشى ورىندا ەكەنىن» ايتتى. سونداي-اق، كومپارتيا بيلىگىنە قارسى ماسسالىق نارازىلىقتار بولىپ جاتقان گونكونگ تۋرالى دا توقتالدى. ول گونكونگتى ىنتىماقتاسۋعا، «بىرگە دامۋعا» شاقىردى.

قىتايدىڭ قازىرگى ساياسي، اسكەري قۋاتى تۋرالى كۇپسىنە ايتىپ كەلىپ، قىتاي باسشىسى شي: «قازىر قىتايدىڭ العا باسۋىنا ەشقانداي كۇش توسقاۋىل بولا المايدى»، – دەپ مالىمدەدى.

قىتاي ارمياسىنىڭ "سۋىق قارۋلارى" كورسەتىلدى. فوتو: رەيتەر.

سالتاناتتى شارا رەسپۋبليكانىڭ 70 جىلدىق مەرەي تويىنان كورى، ەلدىڭ اسكەري قۋاتىن كورسەتۋگە كوبىرەك ۇقسايدى. اسكەري پارادتا قىتاي قارۋلى كۇشتەرىنىڭ وزىق اسكەري تەحنيكالارى كورسەتىلدى.

پارادقا 15 مىڭنان استام قىتاي اسكەرى، 580 اسكەري تەحنيكا، 160 ۇشاق تارتىلعان بولسا، لەمنىڭ 90 ەلىنەن 188 ارميا وكىلدەرى قاتىسقان. بۇلاردان تىس بۇۇ بەيبىتشىلىك كۇشتەرىن قامتىعان قىتايدىڭ 8 مىڭ اسكەرى دە بار.

بەيجىڭ. تيان-انمىن الاڭى. فوتو: رەيتەر.

سونداي-اق، قىتاي بۇل جولى رادارعا كورىنبەيتىن ۇشاقتارى مەن الىس ارالىققا ۇشا الاتىن زىمىراندارىن العاش رەت پارادتا كورسەتىپ وتىر. اسىرەسە، DF-41 قۇرلىق ارالىق بالليستيكالىق زىمىرانى جۇرت نازارىن اۋداردى. قىتايدىڭ قورعانىس وكىلدەرىنىڭ مالىمەتىنە سەنەتىن بولساق، بۇل زىمىراندار ءبىر رەتتە 10 نىسانانى جويۋعا قابىلەتتى. بىراق، جالپى DF ۇلگىسىندەگى زىمىراندار رەسەيدىڭ "اۆانگارد" زىمىراندارىنان دامىتا وتىرىپ جاساعانىن ايتا كەتۋ كەرەك.

“The Qazaq Times”