يران پرەزيدەنتى باس اسسامبلەيا وتىرىسىندا. فوتو; VOA.

يران پرەزيدەنتى حاسان رۋحاني بۇۇ باس اسسامبلەياسىندا جاساعان بايانداماسىندا ير-نىڭ سانكتسيا جاعدايىندا ەشقانداي كەلىسسوز جۇرگىزبەيتىنىن ايتتى. ول اقش-تىڭ 2015 جىلى جاسالعان كەلىسىمنەن ءبىر جاقتى شىعىپ كەتكەنىن جانە وسى كەلىسىمدەگى ەۋروپا ەلدەرىنىڭ كەلىسىمدى جالعاستىرۋعا دارمەنسىز بولعانىن ايتىپ ءوتتى.

حاسان رۋحاني بۇۇ باس اسسامبلەياسىنىڭ 74-ءشى سەسسياسىندا اقش-تىڭ يرانعا جاساعان قىسىمى جانە بۇۇ-نىڭ وعان ۇنسىزدىك تانىتۋىن ايىپتادى. ول سوزىندە: «يران سانكتسيا سالۋ، ەكونوميكالىق قىسىم جاساۋ ارقىلى ءبىر ەلدى تىزە بۇكتىرگىسى كەلەتىن دۇشپانىمەن كەلىسسوز جاسامايدى»، – دەدى.

يران پرەزيدەنتى سول ەلدىڭ رۋحاني كوسەمى اياتوللا حومەنەيدىڭ مالىمدەمەسىنە سىلتەمە جاساي وتىرىپ: «كەلىسسوزگە ورالۋدىڭ جالعىز جولى – 2015 جىلعى كەلىسىمدى قالپىنا كەلتىرۋ جانە سانكتسيالاردى جويۋ»، – دەپ كورسەتتى. ول جانە جالپى الەمگە اقش پەن ەۋروپا ەلدەرىنىڭ كەلىسىمدەگى مىندەتىن اتقارماي وتىرعانى دالەلدەنگەنىن دە ايتىپ وتكەن.

پرەزيدەنت رۋحاني بايانداماسىندا ءيزرايلدىڭ پالەستينا جەرىن باسىپ الۋى، يەرۋساليمدى ورتالىق قالا ەتۋگە تىرىسۋى سىندى اگرەسسيالىق ارەكەتتەرىن ايىپتادى. بۇعان قوسا، باتىس ازيا (باتىستا تاياۋ-شىعىس) وڭىرىندەگى بولىپ جاتقان قاقتىعىستار مەن قانتوگىستەردە يزرايل مەن اقش-تىڭ جاۋاپكەرشىلىگى زور دەپ كورسەتكەن.

پارسى شىعاناعى ماسەلەسى جونىندە يران پرەزيدەنتى: «پارسى شىعاناعىنىڭ قاۋىپسىزدىگى مەن تۇراقتىلىعىن قورعاۋ يراننىڭ تاريحي مىندەتى. يران پارسى شىعاناعى مەن ورمۋز بۇعازىنىڭ بەيبىتشىلىگىن قالايتىن بارلىق ەلدى «ءۇمىت كواليتسياسىنا» نەمەسە «ورمۋز بۇعازى بەيبىتشىلىك كواليتسياسىنا» قاتىسۋعا شاقىرامىز»، – دەپ مالىمدەدى.

 

“The Qazaq Times”