اقش پولشاعا قوسىمشا ءبىر مىڭ سارباز جىبەرەتىن بولدى. بۇل تۋرالى اقش پرەزيدەنتى دونالد ترامپ 23 قىركۇيەك كۇنى نيۋ-يوركتە پولشا پرەزيدەنتى اندجەي دۋدامەن كەزدەسۋدە مالىمدەدى.

ەكى ەلدىڭ پرەزيدەنتتەرى قول قويعان قورعانىس سالاسىنداعى ارىپتەستىكتى كەڭەيتۋ تۋرالى دەكلاراتسياعا سايكەس، اقش پولشاعا قوسىمشا تاعى ءبىر مىڭ ساربازىن جىبەرمەك. ترامپتىڭ سوزىنشە، قوسىمشا اسكەر ەۋروپاداعى باسقا ەلدەردەگى اقش بازالارىنان بارۋى مۇمكىن. پولشا ولاردى قاجەتتى ينفراقۇرىلىممەن قامتاماسىز ەتۋدى ءوز مىندەتىنە العان. بىراق جاڭا اسكەري بازا سالىنبايدى دەپ حابارلاندى. بۇعان دەيىن دۋدا پولشادا اسكەري بازا اشۋ جانە ونى "ترامپ فورتى" دەپ اتاۋ تۋرالى ۇسىنىس جاساعان.

قازىر پولشادا ءتورت مىڭعا جۋىق اقش ساربازى بار. «اقش-تىڭ پولشاداعى اسكەر سانىن كوبەيتۋى رەسەي تاراپىنان تونەتىن قاۋىپكە بايلانىستى ما؟» دەگەن سۇراققا ترامپ "جوق" دەپ جاۋاپ بەرگەن.

بۇل كۇندەرى نيۋ-يوركتە بۇۇ باس اسسامبلەياسىنىڭ 74-سەسسياسى ءوتىپ جاتىر. اقش پرەزيدەنتى وسى جيىنعا كەلگەن بىرقاتار شەتەلدىك مەملەكەت باسشىلارىمەن كەزدەسكەن. باس اسسامبلەيا سەسسياسىنا قازاقستان پرەزيدەنتى قاسىم-جومارت توقاەۆ تا بارعان.

"The Qazaq Times"