اقش پرەزيدەنتى دونالد ترامپ جانە ونىڭ ۇلتتىق قاۋىپسىزدىك جونىندەگى كەڭەسشىسى روبەرت و ' برايەن. فوتو: https://media-cdn.sueddeutsche.de

اقش پرەزيدەنتى دونالد ترامپ زاڭگەر، ساياساتكەر روبەرت و ' برايەندى ءوزىنىڭ ۇلتتىق قاۋىپسىزدىك جونىندەگى كەڭەسشىسى ەتىپ تاعايىندادى. بۇل تۋرالى Sueddeutsche نەمىس باسىلىمى حابارلادى.

وتكەن اپتادا ترامپ بۇرىنعى كەڭەسشى قىزمەتىن اتقارعان 70 جاستاعى دجون بولتوننىڭ وتستاۆكاسىنا قول قويعان. بولتون اقش پرەزيدەنتى قىزمەتىنەن بوساتقان ءتورتىنشى كەڭەسشى. وسىعان دەيىن ۇلتتىق قاۋىپسىزدىك كەڭەسشىسى لاۋازىمىن سيۋزان رايس، مايكل فلينن جانە گەربەرت ماكماستەر اتقارعان. ەندى روبەرت و ' برايەن ترامپ اكىمشىلىگىندەگى بۇل لاۋازىمعا تاعايىندالعان بەسىنشى كەڭەسشى بولماق.

روبەرت و ' برايەن 1991 جىلى بەركلي قالاسىنداعى كاليفورنيا ۋنيۆەرسيتەتىنىڭ قۇقىق فاكۋلتەتىن تامامداعان. 1991-1996 جىلدارى Skadden, Arps, Slate, Meagher & Flom زاڭ كومپانياسىندا قىزمەت ەتىپ، 1996-1998 جىلدارى جەنەۆاداعى بۇۇ قاۋىپسىزدىك كەڭەسىنىڭ اعا زاڭگەرى بولدى.

2005 جىلى بۇۇ باس اسسامبلەياسىندا اقش وكىلىنىڭ ورىنباسارى قىزمەتىن اتقاردى. 2007-2016 جىلدارى Arent Fox زاڭ فيرماسىندا باسقارۋشى سەرىكتەس بولىپ جۇمىس ىستەدى.

2008 جىلدان 2011 جىلعا دەيىن اقش-تىڭ مادەني يگىلىك وبەكتىلەرى بويىنشا كەڭەس بەرۋ كوميتەتىنىڭ قۇرامىنا كىردى، سونىمەن قاتار اۋعانستانداعى سوت رەفورماسى جونىندەگى امەريكا-اۋعان كوميسسياسىنىڭ توراعاسى بولدى. 2011 جىلى اقش پرەزيدەنتتىگىنە كانديدات ميتت ءرومنيدىڭ سىرتقى ساياسات جونىندەگى اعا كەڭەسشىسى بولىپ تاعايىندالدى. 2013 جانە 2014 جىلدارى گرۋزيا مەن ۋكرايناداعى سايلاۋدا حالىقارالىق رەسپۋبليكالىق ينستيتۋتتىڭ باقىلاۋشىسى بولدى.

2015 جىلى اقش پرەزيدەنتتىگىنە كانديداتتاردىڭ سىرتقى ساياسات جونىندەگى كەڭەسشىسى رەتىندە قىزمەت ەتتى. 2018 جىلدىڭ مامىرىنان باستاپ اقش-تىڭ كەپىلدىككە الۋ ءىسى جونىندەگى ارنايى وكىلى قىزمەتىن اتقاردى.

روبەرت و ' برايەن «امەريكا ۇيىقتاپ جاتقاندا: داعدارىس الەمىندە امەريكاندىق كوشباسشىلىقتى قالاي قالپىنا كەلتىرۋگە بولادى» كىتابىنىڭ اۆتورى رەتىندە بەلگىلى جانە اقش قۇرلىق اسكەرلەرى قورىنىڭ مايورى.

"The Qazaq Times"