F-35A اسكەري ۇشاعى الەمدەگى تىك ۇشىپ-قونۋعا قابلەتتى بىردەن ءبىر جويعىش ۇشاق. فوتو: JNS.org.

پولشا F-35 ۇشاقتارىن پايدالاناتىن الەمدەگى ساناۋلى ەلدەردىڭ قاتارىنا قوسىلماق. اقش مەملەكەتتىك دەپارتامەنتى پولشاعا اتالعان وزىق جاۋىنگەرلىك ۇشاقتاردى ساتۋ شەشىمىن جاريا ەتتى.

اقش-تىڭ مەملەكەتتىك دەپارتامەنتى جاريالاعان مالىمەتتە پولشاعا 6,5 ملرد اقش دوللارى قۇنىنا يە 32 دا F-35A اسكەري ۇشاقتارىنىڭ ساتىلاتىنى تۋرالى ايتىلعان. اقش قورعانىس مينيسترلىگى دە اتالعان مالىمەتتى راستاپ، ءىرى اسكەري تەحنيكا ساۋداسىنىڭ ىشىندە F-35A ۇشاقتارىنا قوسا ۇشاق جابدىقتارى مەن ۇشاقتىڭ ەلەكتروندى جۇيەسىنە قاتىستى جابدىقتارى دا كىرەتىنىن جەتكىزگەن.

مالىمدەمەدە، «پولشاعا ساتىلاتىن بۇل اسكەري تەحنيكالار وڭىردەگى اگرەسسيۆتى قاۋىپتەردىڭ الدىن الادى جانە پولشا اۋە قورعانىس سالاسىنىڭ قۇراما شتات كۇشتەرىمەن جۇمىس ىستەۋىن قامتاماسىز ەتەدى»، – دەلىنگەن.

پولشا قورعانىس تاراۋلارى اۋە كۇشتەرىن جاڭارتۋ ءۇشىن اقش-تان F-35 اسكەري ۇشاقتارىن ساتىپ الۋ تۋرالى جوسپارلارىن مامىر ايىندا جولداعان. بۇعان دەيىن پولشانىڭ اۋە كۇشتەرى رەسەيلىك ميگ-29 جانە سۋ-22 ۇشاقتارىن پايدالانىپ كەلەدى.

ۆارشاۆا ءوزىنىڭ قورعانىس سالاسىن جاڭارتۋ جوباسى بويىنشا 2026 جىلعا دەيىن 47 ملرد اقش دوللارىن بولگەن. اقش پەن پولشا اراسىندا بۇعان دەيىن دە ءىرى اسكەري تەحنيكالاردىڭ ساۋداسى بولدى. سونىڭ سوڭعىسى 2017 جىلى 10,5 ملرد دوللارعا اقش-تىڭ «پاتريوت» اۋە قورعانىس جۇيەسىن ساتىپ العان بولاتىن.

“The Qazaq Times”