جاقىندا سايلاۋالدى ۋادەلەرىنىڭ بىرىندە يزرايل پرەمەر-ءمينيسترى بەنيامين نەتانياحۋ سايلاۋدا جەڭىسكە جەتەتىن بولسا باتىس جاعالاۋداعى ءبىراز اۋماقتى اننەكتسيالايتىنىن مالىمدەگەن بولاتىن. ونىڭ بۇل مالىمدەمەسى اراب ەلدەرىنىڭ نارازىلىعىنا تاپ بولدى.

يزرايل پرەمەرى بۇعان دەيىنگى مالىمدەمەلەرىندە «يزرايل قاۋىپسىزدىگى ءۇشىن» يوردان القابىنا دەگەن كيلىگۋىن جالعاستىراتىنىن ايتىپ كەلگەن. الايدا، « اننەكتسيالاۋ» تۋرالى بىردە ءبىر رەت ءسوز قوزعاعان ەمەس-ءتى.

يوردان القابى باتىس جاعالاۋدىڭ ۇشتەن ءبىرىن يەلەيدى. فوتو: Reuters.

يزرايل مەن كەلىسسوزدەر جۇرگىزىپ جاتقان پالەستينالىق كوميسسياسىنىڭ وكىلى نەتانياحۋدىڭ مالىمدەمەسىنە نارازىلىق ءبىلدىرىپ: «اننەكتسيالاۋ اسكەري قىلمىس قاتارىندا وڭىرلىك بەيبىتشىلىك كەلىسىمدەرىن ءبىر جولاتا جوق قىلادى»، – دەپ مالىمدەدى.

اراب ەلدەرى ليگاسى ەۆرەي پرەمەرىنىڭ ءسوزىن «اگرەسسيا» رەتىندە باعالادى. بۇعان قوسا، تۇركيا، يوردانيا، ساۋد ارابياسىنىڭ رەسميلەرى دە مالىمدەمە جاساپ، ەۆرەي باسشىسىنىڭ ءسوزىن سىناپ جاتىر. ساۋد ارابياسى بولسا يسلام ىنتىماقتاستىق ۇيىمىنا مۇشە 57 ەلدىڭ ءسىم باسشىلارىن شۇعىل جينالىسقا شاقىردى.

نەتانياحۋ ءوزىنىڭ اننەكتسيالاۋ تۋرالى جوسپارىن سايلاۋالدى ۋادەسى رەتىندە جاريالاپ وتىر. ەۆرەي جۇرتىندا 17 قىركۇيەك كۇنى جالپى سايلاۋ وتپەك.

پالەستينالىقتار جاسايتىن باتىس جيەك ايماعى 1967 جىلى يزرايل تارابىنان جارىم-جارتىلاي وتارلانعان بولاتىن. پالەستينالىقتار بۇل ايماقتى تولىقتاي پالەستيناعا تاۋەلدى ەكەنىن ايتىپ كەلەدى. سول جىلى يزرايل باتىس جيەكپەن بىرگە گولان جوتالارىن، شىعىس يەرۋساليم جانە گازانى باسىپ العان بولاتىن.

“The Qazaq Times”