اقش مەملەكەتتىك دەپارتامەنتى يراننىڭ مۇناي تاسىعان كەمەسىنىڭ كاپيتانىنا ميلليونداعان دوللار ۇسىنعانىن راستادى. ۋاشينگتوننىڭ رەسمي تۇلعاسى برايان حۋك يراندىق Adrian Darya 1 تانكەرىنىڭ كاپيتانىنا ەلەكتروندى حات جولداپ، كەمەنى اقش ۇستاپ كەتە الاتىن ايماققا ايداپ بارسا جەكە شوتىنا ميلليونداعان دوللار اۋداراتىنىن ايتقان.

اتالعان كەمە شىلدە ايىندا گيبرالتار جاعالاۋىندا شيكى مۇناي تاسىپ بارا جاتقان جولىندا بريتاندىق اسكەريلەر جاعىنان تۇتقىندالعان بولاتىن. ونى اقش پەن ەو-نىڭ سۇرياعا قارسى سانكتسياسىن بۇزدى دەپ ايىپتاعان. الايدا، يران بيلىگى بۇل ايىپتاۋدى جوققا شىعارىپ، كەمەنىڭ باعىتى ءسۇريا ەمەس ەكەنىن ايتتى. وسىدان كەيىن Adrian Darya 1 بوساتىلعان. اقش بۇل قادامدى سىنعا الىپ، كەمەنى بوساتپاۋدى تالاپ ەتكەن.

اقش مەملەكەتتىك دەپارتامەنتىنىڭ كەمە كاپيتانىن ساتىپ الماق بولعانىن Financial Times باسىلىمى جازىپ شىقتى. امەريكالىق رەسمي تۇلعانىڭ جولداعان ەلەكتروندى حاتىندا مەملەكەتتىك دەپارتامەنتكە بايلانىستى شۇعىل ۇسىنىس تا ايتىلادى. الايدا، كەمە كاپيتانى اكحيلەش كۋمار حاتقا جاۋاپ بەرمەگەن، سوندىقتان دا ۋاشينگتون ونى دا سانكتسيا تىزىمىنە ەنگىزگەن.

«كەمەنىڭ كومانديرلەرىنە جانە ولاردى باسقارعان كومپانياعا دا قارسى شۇعىل ارەكەت ەتتىك»، – دەلىنگەن مەملەكەتتىك دەپارتامەنتتىڭ ءباسپاسوز بايانىندا.

وتكەن اپتادا اقش Adrian Darya 1 كەمەسىن قارا تىزىمگە ەنگىزدى. ءارى، تانكەردەگى شيكى مۇنايدىڭ سۇرياعا باعىتتالعان دەگەن پىكىرىنەن تانباي كەلەدى. ترامپ اكىمشىلىگى يراندىق تاسىمال كومپانياسىنا سانكتسيا سالدى جانە تەھراننىڭ جاساعان جۇيەسىنە توسقاۋىل جاساعان ادامعا 15 ملن دوللار سىيلىق اقى بەرەتىنىن دە جاريالادى. يران ءسىم باسشىسى مۇحامماد جاۆاد زاريف ترامپ ۇكىمەتىنىڭ بۇل ارەكەتىن «پارا ۇسىنىپ جاتىر» دەپ سىنعا الدى.

“The Qazaq Times”