ميللياردتاعان ادام تازا سۋعا قول جەتكىزە الماي وتىر. فوتو: livemint.com.

بىرىككەن ۇلتتار ۇيىمى جاساعان مالىمدەمەدە، ادام تىرشىلىگىنە قاجەتتى سۋ قورىنىڭ بارعان سايىن ازايىپ بارا جاتقانىن العا تارتىپ، الداعى بەس جىلدىڭ وزىندە الەمنىڭ كوپتەگەن ەلدەرى سۋ تاپشىلىعىنان زارداپ شەگەتىنىن ەسكەرتتى.

بۇۇ مالىمەتىنە قاراعاندا 2025 جىلعا جەتكەندە الەمدە 2 ميللياردقا جۋىق ادام اۋىز سۋ تاپشى ايماقتار نەمەسە مەملەكەتتەردە جاساپ قالۋى مۇمكىن ەكەنىن ايتادى. قازىردىڭ وزىندە كوپتەگەن مەملەكەتتەر ەلدى قالاي اۋىز سۋمەن قامتۋ ماسەلەسىمەن باس قاتىرادى.

جەر بەتىندە ادامداردىڭ سانى كوبەيگەن سايىن تابيعي رەسۋرستاردىڭ شىعىنى دا ارتۋدا. ميللياردتاعان ادام اۋىز سۋ تاپشى ايماقتاردا مەكەندەيدى. الداعى ۋاقىتتا بۇل سان ءتىپتى دە كوبەيمەك.

جەر شارىندا سۋ قورى ازايدى ما؟ مۇلدە ولاي ەمەس. پلانەتامىزدىڭ شامامەن 70 پايىز اۋماعىن سۋ يەلەيدى.  بىراق، وسى مول سۋدىڭ تەك 3 پايىزى عانا تازا سۋ. سول تازا سۋدىڭ 90 پايىزى اۋىل شارۋاشىلىعىنا پايدالانىلادى.

ورتا قورعاۋ عالىمدارىنىڭ پىكىرىنشە، ادامزات قازىردەن باستاپ سۋدى پايدالانۋدىڭ دۇرىس جولىن ۇيرەنبەسە، ەندى 50 جىلدان كەيىن سۋ ماسەلەسى جاھاندىق ەڭ ۇلكەن ماسەلەلەردىڭ بىرىنە اينالادى.

“The Qazaq Times”